Nafarroako ahozko ondaretik jasotako kontuak eta kantuak biltzen ditu Xaldun Kortin, Jolastu gurekin! egitasmoak. Mendez mende eta ahoz aho etxeetako sukaldeetan transmititu den ondare hori guztion esku jartzea du helburu ekimen honek, eta guraso.eus era ekarri nahi izan dugu, gurasoentzako baliabide ederra delakoan.

Etxez etxe jasotako ondarea

Euskokultur Fundazioko patronatukide den Maite Lakar Iraizoz herriz herri eta etxez etxe ibili zen, bertze anitzekin batera, gure aitona-amonen bizipenak biltzen. Horien artean zeuden garai batean etxeko txikienen belarriak gozatzen zituzten kantu, kontu, jolas eta ipuinak. Lekukotasun horiek oinarri hartuta, bigarren fasean Xaldun Kortin, Jolastu gurekin! argitalpen multimedia prestatzeari ekin zioten Lakarrek berak (Euskokultur), Patri Arburuak (Bortzirietako Euskara Mankomunitatea) eta Itziar Lurik nahiz Gaizka Arangurenek (Labrit Ondarea). Grabazio lanetan parte hartu zuten, halaber, Nafarroako hainbat eskolak.

Irakasleentzako eta ume txikiak (0-6 urte) dituzten familientzako bilduma ezin aproposagoa dela iritzita, Xaldun Kortin, Jolastu gurekin! bilduma digitalizatzeko eta sarean jartzeko beharrezko urratsak egin ditu Nafarroako Hezkuntza Departamentuak, ahozko euskal ondarearen puska hori hezkuntza komunitatea osoaren eskura egon dadin betiko.

Testua eta bideoa: Xaldun Kortin, Jolastu gurekin!