UEUk 53. Udako Ikastaroak aurkeztu ditu. Azken hiru urteetako hariari jarraituz, 20 jardunaldi eta topaketa antolatu ditu hainbat eragilerekin elkarlanean, euskal gizartearentzat garrantzitsuak diren gaien inguruan hausnartzeko helburuarekin.

UEUren Udako Ikastaroen arduradun Irati Iciarrek azaldu du aurtengo edizioan 20 jardunaldi, topaketa eta gogoeta gune prestatu dituztela: “Iruñea, Baiona eta Eibarrez gain, aurten Tolosa, Usurbil, Bilbo, Gasteiz eta Errenteriara ere iritsiko dira UEUren Udako Ikastaroak. Duela hiru urte, Udako Ikastaroen 50. urteurrenaren harira, gizartearentzat eta UEUrentzat estrategikoak diren gaiak lantzeko erabakia hartu genuen, eta ildo horretan jarraituko dugu. Udako Ikastaroak konpartitzeko guneak dira. Izan ere, UEUk izaera herritarra dauka eta euskal gizartearentzat interesgarriak eta beharrezkoak diren gaiak lantzeaz gain, parte-hartzea sustatuko dugu”.

Ekainaren 11tik uztailaren 11ra

Udako Ikastaroek hilabete iraungo dute, ekainaren 11tik uztailaren 11ra eta jardunaldietako bat irailera ere zabalduko da. Euskal Herriko txoko askotara iritsiko dira: Iruñea, Eibar, Baiona, Tolosa, Usurbil, Bilbo, Gasteiz eta Errenteriara. Ahalik eta jende gehienak parte har dezan, 10 euro balioko dute matrikula guztiek. Informazio guztia www.ueu.eus helbidean aurki daiteke.

Heziketa eta gurasotasunarekin lotutako ikastaroak

Esan moduan, askotariko ikastaroak daude. Horien artean dira heziketa edo gurasotasunarekin lotutako hainbat: