“Kalitatea, eduki bertikalak eta ikus-entzunezkoak” oinarri dituen doako aldizkari digitala da Zut, gazteei zuzenduta eta eduki berritzaileekin beteta.

Jaio da Z belaunaldiari zuzenduta dagoen Zut izeneko aldizkari digitala. Gazteak hartzaile-xede izanik, ikus-entzunezkoa oinarri duen produktu multimedia bat da Zut. Hain zuzen, Ttap aldizkariaren anai-arreba gaztea. Izan ere, aplikazio hutsa baino gehiago da, gazteak protagonista bilakatzea helburu duena. Euskal gazteek euskarazko edukiak kontsumitzeko joera berreskura dezaten bideoak, argazkiak, musika… modu bertikalean ikusteko sortu da, mugikorra biratu barik, edukiak zut-ik ikusteko.

Gaztezulo-ren eta Ttap aldizkaria egiten duten ADM SLren artean sortutako proiektua da. ADM-ko kide dira: Tokikom, Esguard, Anboto, Baleike, Euskalerria Irratia eta Goiena. Euskara hutsean izango da, erabat berritzailea, “Euskal Herrian ez baita horrelako proiekturik ezagutzen”.

Dagoeneko deskargatu daiteke aplikazioa mugikorretan. Horretarako bideak honako hauek dira: Android eta iOS gailuetan; www. zut.eus helbidean; eta Instagram-en @zut_aldizkaria.

Euskal Herrian aitzindari

Edukiak atalka aurkeztuko ditu, eta hamabostean behin eduki berriak eskuragarri izango dituzte gazteek, eta baita aurretik eskainitakoak behin eta berriz erreproduzitzeko aukera ere. IXA-serie aplikazioa –Euskal Herriko lehen telesail aplikazioa–, elkarrizketa nagusia, musika, youtuberren txokoa, telesailak, moda, sexologia eta lehiaketa-erronkak dira batzen dituen atalak. “Gazteen parte hartzea ezinbestekoa izango da, eta kontsumitzaile aktiboak izatea nahi dugu. Haiek izango dira aldizkariaren protagonistak”.

Zut ikusteko