Uztailaren 31n amaituko da aurtengo Euskarabentura. Hilabete osoan zehar, 126 gaztek Euskal Herria zeharkatu dute, Atharratzetik Getxora, 500 kilometro baino gehiagoko ibilbidea osatuz herriz herri.

15 eta 17 urte bitarteko gazteek parte hartu dute espedizioan. Zazpi lurraldeetako partaideak elkartzen dira urtero, bakoitza bere hizkuntza errealitate, kultura eta bizipenekin, baina guztiek helburu bera partekatzen dute: euskaraz bizitzea, harreman berriak sortzea eta Euskal Herria ezagutzea.

Egunero etapa berri bati ekin ondoren, gazteek hitzaldiak, tailerrak, mahai-inguruak eta askotariko jarduerak egiten dituzte. Euskara da egitasmoaren ardatza, baina natura, kultura, osasuna, ekologia edo parekidetasuna bezalako gaiak ere lantzen dituzte.

Euskarabenturan parte hartzeko, gazteek aurrez proiektu pertsonal bat eta aurkezpen bideo bat aurkeztu behar izan dituzte. Hautatutakoek espedizioan parte hartzeko beta dute, eta hilabete batez euskaraz %100ean bizitzeko aukera dute, eguneroko harreman guztiak horrela eraikiz.

Amaitzear den aurtengo espedizioak berriro erakutsi du euskarak gazteen arteko topagune izaten jarraitzen duela.