Korterraza Gasteiz film laburren jaialdia sendotu ondoren, duela hamahiru urte sortu zen Korterraza Araba, jaialdian hautatutako film labur onenak Arabako herriz herri zabaltzeko helburuarekin. Hasieran bi eguneko jaialdi formatua izan bazuen ere, egun bakarreko saioak antolatzera igaro dira. Gainera, udalerri bakoitzak bere publikoaren arabera aukeratzen du eskaintzaren izaera: haurrei zuzendutako filmak –Korterraza Txiki–, komediak –Korterraza Komedia–, urteko film onenen aukeraketa –Korterraza Super Seleccion– edo nahasketa bat –Korterraza Mix–.

Txikienentzako, film mutuak

Korterraza ‘Txiki’ eta ‘Mix’ aukeraketek dakartzate haurrei zuzendutako filmak. Film hauek, oro har, mutuak dira; elkarrizketarik gabekoak. Kanpotik ekartzen dituzte gehienak eta gazteen irakaskuntza dute helburu. Horrelako laburmetraiek osatzen dute ‘Txiki’ selekzioa eta ‘Mix’-aren kasuan, laburrek aurrera egin ahala helduendako filmek hartzen dute protagonismoa.

Proiekzioak aire zabalean

Korterraza Arabaren helburu nagusietako bat kultura kalera eramatea da. Horregatik, proiekzioak aire librean egiten dira, herritarren arteko topagune eta sozializazio gune bihurtuz. Eguraldi txarra egiten badu, antolakuntzak ordezko aukera prestatzen du, nahiz eta jaialdiaren izaera kaleko emanaldietan oinarritzen den.

Egitasmoak hazkunde nabarmena izan du urteotan. Gaur egun 38 herritara iristen da Korterraza Araba. Ekainean hasi zen aurtengo bira, eta abuztuaren amaierara arte luzatuko da. Hemen klikatuz ikusi daiteke egutegia herriz herri.

Jasotako film onenak ikusgai

Korterraza Gasteiz Goya sarietarako kalifikagarria den jaialdia da, eta urtero jasotzen dituen film laburren artean aukeraketa egiten du. Aurtengo edizioan ia 1.400 film labur jaso dituzte; horietatik 28 euskarazkoak izan dira. Euskaraz aurkeztutako lanen artean bost hautatu dituzte euskarazko sekziorako, eta horietako bik gainerako sekzioetan dute lekua.

Hautaketa askotarikoa eta orekatua osatzen saiatzen dela urtero, publiko guztiei zuzendutako programazioa eskaintzeko asmoz. Horrela, udako hilabeteetan, film laburrak eta zinema herriz herri gerturatzen jarraituko du Korterraza Arabak.