Gipuzkoako Foru Aldundiaren Kultura Departamentuak jarri du abian udako Kultura Bonu Gaztea kanpaina. Kanpaina 16 eta 29 urte arteko gazte gipuzkoarrei zuzentzen zaie, 40.000 euroko aurrekontua du eta euskarazko kultura produktuen erosketa sarituko du. Knpaina uztailaren 18tik dago abian eta irailaren 30era arte egongo da martxan. Guztira, 3.666 kultura bonu egongo direla eskuragarri –1.670 bonu euskarazko kultura produktuetarako eta 1.996 bonu beste hizkuntza batzuetako kultura produktuetarako–.

“Programak hobari handiagoa izango du euskarazko kultura-produktuak erosteko. Hala, gazteek 12 euroko deskontua izango dute 20 euro edo gehiagoko erosketetan, produktuak euskaraz erosten dituztenean, eta 10 euroko deskontua 20 euro edo gehiagoko erosketetan, produktuak beste hizkuntza batzuetan erosten dituztenean”. Erabiltzaile bakoitzak kategoria bakoitzeko bost bonu trukatu ahal izango ditu gehienez; hau da, hamar bonu gehienez gazte bakoitzak. Bonuak %100 digitalak izango dira, eta ezin izango dira aldez aurretik eskuratu; deskontua zuzenean aplikatuko da establezimenduan transakzioa egiten den unean, NANa erakutsita.

Programara atxikitako establezimenduen zerrenda hemen ikus daiteke.