Behinola, Galtzagorri elkarteak kaleratzen duen Haur eta Gazte Literatura Aldizkaria urtean bitan argitaratzen da. Bertan, artikuluak, erreportajeak, ipuinak, liburu iruzkinak…biltzen dira. Uda honetan jasoko dugu 53. alea.

Kolore urdinari eskainitako ale berezia kaleratu du Behinola aldizkariak. 53. zenbaki honetan, urdina ardatz hartuta, kolorearen inguruko hausnarketa zabala egin dute, bai ikuspegi artistikotik, bai kulturaletik eta editorialetik.

Erreportaje nagusiak aldizkari edo liburu bat sortzeko egiten den bidea aztertzen du, Behinolaren ekoizpen-prozesua adibide gisa hartuta. Sormen-lan bat inprimatutako argitalpen bihurtzeko hartu beharreko erabakietan sakontzen du, diseinutik inprimaketara arteko urratsak azalduz.

Bestalde, kolorearen esanahiari eta bilakaerari erreparatzen dio aleak. Kolorea argiarekin eta mugimenduarekin lotutako fenomenoa dela abiapuntu hartuta, urdinaren historia aztertzen da, gogoraraziz koloreen pertzepzioa ez dela unibertsala, baizik eta garaien eta kulturen arabera aldatzen den konbentzio sozial eta kulturala.

Ilustrazioan eta testuan koloreak duen presentziari ere tartea eskaintzen dio aldizkariak. Horrez gain, zortzi euskal idazle eta ilustratzaileren kolore gustukoena bildu dute, bakoitzaren ikutínezek prestatu ditu, eta Lau Eskutara atalean inprimaketaren bi ikuspegi jaso dituzte: Rodona inprimategiko Ana Iribarrenek inprenta digitalari buruz idatzi du, eta Antoher Presseko Begoña Cuberíak errisografiaren inguruko ekarpena egin du.

Bestalde, Juan Kruz Igerabide idazleak bere liburu kuttunaren berri ematen du, eta euskarara ekartzeko proposamen gisa, Mireia Delgado Behinolako erredakzioko kideak Txanogorritxo ipuinaren bertsio esanguratsu bat hautatu du. Aleko liburu-iruzkin guztiek ere badute hari komun bat: kolorea, eta bereziki urdina.

Behinolaren harpidedunek laster jasoko dugu ale berria etxean.

Zenbaki honetako azala, kontrazala eta Sormenez ataleko ilustrazioak Paula Estévez ilustratzailearenak dira; atal horretako sormen-testua, berriz, Edu Zelaietak idatzi du. Denbora-pasak Olaia Martinezek.