Haur-obesitatea XXI. mendeko osasun publikoaren arazo nagusietako bat da. Haur-obesitatea prebenitzeko SANO estrategia aurkeztu berri dute Euskadin.

SANO programak informazioan, osasun-hezkuntzan, jarduera fisikoaren sustapenean eta elikadura osasungarrian oinarritutako neurriak dituela azaldu du Osasun sailburu Nekane Murgak. Garrantzitsua da ingurune ez obesogenikoak sortzea, gizartea kontzientziatzea, erabaki osasungarriei bide ematea eta hura prebenitzeko jarduketa-urratsak ezartzea.

Aurkeztu diren neurrien artean daude honako hirurak:

1- Informazio-kanpaina: Elikadura osasungarria egiteko familia-, eskola- eta osasun-ingurunera bideratuko da. Kanpainaren helburua da erosketa egiteko, eguneko edo asteko menua prestatzeko edo etxetik kanpora jatean menu egokia aukeratzeko orduan erabakiak hartzen laguntzea.

2- Diru-laguntza bereziak: Handitu egin dira guraso-elkarteentzako eta irakaskuntza-kooperatibentzako laguntza ekonomikoak. Ikasleen artean jarduera fisikoa sustatzera bideratutako parte-hartze proiektuak garatu nahi dira. Eskola-bideak sortzea eta dinamizatzea, jolasteko patioak egitea, ikasteko eta mugitzeko espazioak eraldatzea, familian jarduerak egiteko espazioak bultzatzea…

3- APP bat jarri dute martxan, lehen mailako arretarako pediatriako kontsultetan gainpisua eta haur-obesitatea tratatzeko laguntza-tresna gisa.

Euskadiko datuak

Osasun Publikoaren eta Adikzioen zuzendari Juanjo Aurrekoetxeak emandako datuen arabera, gaur egun, Euskadin, gomendatutako pisutik gora duten umeen proportzioa jaitsi egin da. 2012an %32,5 zen, eta 2017an, % 24,7 da. Hala ere, ume obesoen ehunekoa hazi egin da. 2015eko Aladino Euskadi azterlanak utzitako datuen arabera 6 eta 9 urte bitarteko biztanleriaren %34,2k zeukan obesitatea edo gainpisua. Bestalde, 7 eta 14 urte bitarteko mutikoen %5,6ak eta neskatoen %7,9ak ez du ariketa fisikorik egiten.

Argazkiaren iturria Rene Bernal: hemen

Informazio gehiago: hemen.