“Transitos” Haurren eta gazteen transexualitatea gurasoen kontakizunen bidez ulertzeko liburua
Ezinbesteko liburu horietako bat ondu du Aingeru Mayorrek: Tránsitos. Comprender la transexualidad infantil y juvenil a través de los relatos de madres y padres. (Ed. Bellaterra). Ezinbestekoa, hainbat arrazoirengatik, baina batez ere honengatik: haur edo gazte transexual baten guraso den edonorentzat (behar ez lukeen, baina zoritxarrez izan ohi den) iluntasun erabatekotik ateratzeko itsasargia eskaintzen duelako.
25 narrazio bildu ditu liburuaren lehen zatian Mayorrek, ez fikziozkoak horratik, 25 bizipen baitira. 25 ama edo aita euren seme-alabei buruz hizketan, askotan amorruz, askotan penaz, batzuetan umorez zipriztinduta, beti bihotza eskuetan harturik. Biluzi egin dira gurasoak, eta gu haiekin, haien bizipen hunkigarriak irakurtzean. Larru-bizitan uzten gaitu liburu honek, garen bezalakoak erakusten gaituelako ispiluaren aurrean, dauzkagun aje eta akats guztiekin, photoshopik gabe; garen bezalakoak izatea nahi duelako Aingeru Mayorrek. Ez gehiago, ezta gutxiago ere.
Liburuaren bigarren eta hirugarren zatian (Análisis; Reflexiones), guraso horien bizipenak eta egilearen beraren esperientzia aintzat harturik, mapa moduko bat marrazten du Mayorrek. Haurren eta gazteen transexualitatea ulertzea da mapak ezkutatzen (ez) duen altxorra. Konprenitu ahal izatea, kasu batzuetan, jaiotakoan esleitzen diguten sexua (dauzkagun genitalei ustez dagokiena) eta sentitutako sexua ez datozela bat. Haur eta gazte horien bidaia emozionala zenbaterainokoa den ikusteko ere balio du liburuak, eta konturatzeko, ia beti, besteok garela bidean trabak, kezkak eta beldurrak aurreikusten ditugunak. Beraiek ere badituzte, noski, baina beraiek, gehienetan, argi dute egin egin nahi dutela bidaia hori. Kosta ahala kosta.
Finean, haur eta gazte transexualitateari buruzko liburu mugarria dela esango nuke argitaratu berri den hau. Hartuko ahal du norbaitek, berandu baino lehen, euskaratu eta argitaratzeko ardura?
Bertol Arrieta Kortajarenak idatzitako kritika
Bertol Arrieta Kortajarena
@bertolarrieta
Iruzkinik ez "“Transitos” Haurren eta gazteen transexualitatea gurasoen kontakizunen bidez ulertzeko liburua"