Azaroaren 4an, guraso batzuk gaztelaniaz argitaratu zuten Haurren itxialdirik ez manifestua Gara egunkarian, eta sortutako erreakzioak ikusita, manifestua euskaratu eta atxikimendu kanpaina abiatzea erabaki dute.

Pandemiak ekarritako egoera berri honen aurrean, Eusko Jaurlaritzako agintariek esan dute ez dutela baztertzen etxe konfinamendua agintzea, eta Espainiako Gobernuak ere errepikatu du “geroz eta neurri gutxiago” hartu daitezkeela konfinamenduaren aurretik. Adierazpen horiek ezinegona eragin dute dozenaka gurasorengan, eta dokumentua hedatzea erabaki dute.

Lehenengo eta behin, manifestuan, aurreko itxialdiko azterketa egin dute, eta azpimarratu dute, besteak beste, Europako gobernuek bestelako erabakiak hartu zituztela gai honi dagokionez: “Italiarra izan ezik, Europan ez zen egon haurrei hain neurri gogorrak ezarri zizkien gobernurik. Adibidez, Estatu frantsesak herritar orori ordubetez irteteko aukera eman zien, baita okerren zeuden eskualdeetan ere, Paris eta Grand Est kasu”. 

Oharrean salatu dute Espainiar estatuak “frogetan oinarritu gabe” hartu zituela haurren inguruko erabakiak. “Umeek etxean geratu behar zuten agintariek oinarrizkoak ez diren milaka langile beraien lanpostuetan mantentzen zituzten bitartean. Guzti hori, haurrak Koronabirusaren transmisio bektore handiak zirela baieztatzen zuten suposizio eta zurrumurruen artean”. Eta esandakoaren bidetik, “kontraesanak” agerikoak direla ere salatu dituzte gurasoek, eta adibidetzat jarri dituzte lanera joateko baimenak: “Gure seme-alabak etxean gelditzera behartuta zeuden bitartean, gure bizilaguna egunero joan zen lanera, armak fabrikatu eta esportatzera dedikatzen den enpresa batera”.

Pandemiaren puntu berri honetan, berriz azpimarratu nahi izan dute gaitzak umeengan duen “eragin eskasa”, eta adierazi dutenez, kalean kutsatzearen arriskua “baxua” da. “Haurrak berriz etxean erabat giltzapetzeak ez du inolako justifikaziorik”, iritzi dute. Hala, gehitu dute Gobernu zentral eta autonomikoek -udal eta mugimendu sozialekin batera-, pertsona, familia eta elkarbizitza unitateak egunero kalera irteteko aukera bermatu behar dutela. “Bestela, kontzientzia-objekzio, intsumisio eta, agian, desobedientzia zibilaren garaietan sartuko gara berriz ere”, esanez amaitu dute idatzia.

Dokumentua osorik, hemen

Etiketak: