Oihana Abuinek 15 urte daramatza lanean hizkuntzaren esku-hartzeari lotuta, hezkuntza alorrean. Lehen Hezkuntzako, entzumen eta hizkuntzako eta pedagogia terapeutikoko irakaslea da, eta proiektu berria jarri du abian: Silkapedia. Besteak beste, haurren hizkuntza estimulatzeko gakoak ematen dituen espazioa da.

Zer da Silkapedia?

Nik sortutako web orrialde bat da, eta bertan materiala eta ikastaroak jartzen ari naiz. Helburua modu errazean haurren hizkuntza estimulatzeko gakoak ematea da. Garrantzitsua da hizkuntza irakurriaren eta ahozkoaren inguruan hitz egitea, eta gurasoei edota irakasleei zuzendutako euskarri bat egon zedin nahi nuen. Ideia da, poliki-poliki, ikastaroak sartzen joatea.

Ikastaroa eta materialak zuk egiten dituzu?

Bai, webgunean dagoen guztia nik sortutakoa da. Materiala euskaraz eta gaztelaniaz dago; dena PDF formatuan deskargatzeko moduan (gero bakoitzak ikusiko du plastifikatu ala ez). Eta batzuk doan dira eta beste batzuk ordainpekoak jarri ditut. Nire ustez, aproposak dira etxean erabiltzeko baina baita eskolarako ere; irakasleek gelan erabil ditzakete.

Eta ikastaroari dagokionez, oraindik bakarra eskegi dut (haurraren estimulazioaren ingurukoa da) . Aurrez grabatutako 28-30 bideo dira, eta izena ematen duenak nahi beste aldiz eta nahi duenean ikus ditzake.

Behar bat sumatzetik abiatu duzu proiektua?

Bai. Askotan hitz egiten dut hizkuntza zailtasunak dituzten haurren gurasoekin, eta egia da jarraibideak ematen dizkiedala, baina gero, etxera ailegatutakoan, pentsatzen dut: “Ez diot kontatu entzun behar zuen guztia!”. Denbora mugatua da; pare bat orduko bilera batekin ez dut nahikoa izaten, eta orduan esan nuen: “Nola esan diezaioket nik guraso bati egin dezakeen guztia eta nahi dudan moduan? Zer egin dezaket guraso horiengana iristeko eta informazio baliagarria –eta batez ere praktikoa– emateko? “.

Informazio praktikoa?

Bai. Gehienetan, alor honetan, jarraibideak ematen direnean teorikoak izaten dira: “Hau egin beharko zenuke… Hau egin dezakezu…”, Praktikotasuna beti geratzen da at.

Praktikotasun horri ekiteko sare sozialetan ere trikimailuak ematen dituzu, ezta?

Bai, Facebook eta Instagram-en nabil, eta esan duzun bezala, trikimailu txikiak eman nahi izaten ditut; adibidez, kurtsoa ordaindu nahi ez duenak ere hor izan ditzan. Hizkuntzarekin zerikusia duten gakoak dira edo idazketa-irakurketarekin lotura dutenak.

Adibidez?

Pila bat daude, esaterako, alfabetoa edo letren izenak erakutsi baino lehen, hizkien soinuak erakustea. Hori oso trikimailu garrantzitsua da, izan ere, hizkiak soinuak baino lehen erakusten badira, irakurketa prozesuan zailtasunak sor daitezke.

“Zeta” esan beharrean zzzzz soinua egitea esan nahi duzu?

Bai, hori da.

Eta besterik?

Adibidez zenbait produktu edo objekturen erabilera aztertzea ere garrantzitsua da gai honi lotuta. Egia da egunerokotasunean erabiltzen ditugun hainbat tresna oso onuragarriak izan daitezkeela momentu jakin batean, baina asko erabiltzeak ere arazoak ekar ditzake. Txupetearen kasua da: behar baino gehiago erabiliz gero, aho sabaia deformatu dezake, hortzak lekuz mugiarazi edo hain tipikoa den degluzio atipikoa sortu dezake.

Ohikoa izaten da, hizkuntzari lotutako arazoen aurrean, gurasoek zer egin ez jakitea?

Bai, eta oso ohikoa izaten da “beno, txikia da, hitz egingo du” bezalakoak  esatea. Aitzakiak dira, eta askotan, gurasook eta irakasleok ez dugu ezer egiten, eta denbora interesgarria ari gara galtzen. Arazoren bat badago, komeni da lehenengo pediatrarengana joatea –ea patologiaren bat edo zailtasunen bat dagoen jakiteko–, eta ondoren logopeda rengana edo eskolako entzumen eta hizkuntzako espezialistarengana.

Ageriko zailtasunik ez bada ere garrantzitsua da haurren hizkuntza estimulatzea?

Zalantzarik gabe. Garrantzitsua da ahozkotasunerako, hiztegirako, esaldi eta pragmatikarako… Hizkuntzaren edozein alorretan trebatzeko da. Zailtasunik izan ez arren, estimulatu egin behar da haien hizkuntza, eta jakina, zailtasunak badituzte, are gehiago.

Zer esango zenieke gurasoei?

Gurasook etxean ere asko egin dezakegula gure seme-alaben hizkuntza estimulatzeko. Lan egiteko aukera bikaina dugu etxean, bertan igarotzen baitugu denbora gehien; eskolan baino gehiago.

Etiketak: