2008az geroztik Intujai Teatro taldeak Ahoz Aho Ahozkotasunaren Nazioarteko Jaialdia antolatzen du. Azken urteetan Euskal Herriko herrietan zehar hedatu da, eta oraingoan Oñatik jaso du jaialdian parte hartzeko gonbidapena. Hori horrela, datozen asteetan hiru ipuin-kontaketa saioz gozatzeko aukera egongo da, haur nahiz helduentzat.

Intujai Teatro taldeko kide eta jaialdiko arduradun May Gorostiagak azaldu du ahozkotasuna bultzatzea eta ahotsa erabiltzen duten artistak “oholtzaratzea” dela Ahoz Ahoren helburua, eta nazioarteko jaialdia denez, atzerriko artistak ere izaten dituztela: “Maisu handiak izaten dira horiek, eta, jakina, euskaldun artistak ere badaude egitarauan, %70 inguru dira”. Are gehiago, adierazi du Euskal Herrian “maila handia” dagoela ipuin kontalariei dagokienez.

Ahozkotasuna, arbasoengandik jaso dugun “iturri handiena” da Gorostiagarentzat: “Hitzak idatzi baino lehen ahotsa bageneukan, eta horrela, belaunaldiz belaunaldi, mezuak jaso ditugu gure aurrekoengandik”. Esan du gure DNAan dagoen zerbait dela, eta askotan “dekodifikatu” egin behar den arren, jakinduria gurekin daramagula.

Familietan, solasaldiak pizteko aukera

Ipuin-kontaketetan askotariko teknikak eta estiloak daude, eta Intujai taldeko kide batzuk proposamen berritzaileekin datoz; beste batzuk, aldiz, ipuin tradizionalak dituzte oinarri.

Nolanahi ere, teknikak albo batera utzita, hartzaileengan jarri du arreta Gorostiagak: “Topiko bat dago, baina ipuinak haur nahiz helduentzako dira”. Hala, Gorostaigak gonbidapena egin die familiei denak batera ipuinak entzutera joateko. Gainera azpimarratu du hori “oso aberasgarria” izaten dela, ondoren “momentu goxoak” sortzen dituelako etxean: “Ipuinaren aitzakiarekin gauza askoren bueltan hitz egin dezakegu etxean. Ateak irekitzen dira, eta solasaldiak piztu”.

Eskaintza zabala, Oñatin

Otsailaren 18an, Elekaren ipuin sorta izeneko bi saio eskainiko dituzte Ipar Euskal Herritik etorritako Kattalin Sallaberryk eta Jokin Irungarayk, 6 urtetik gorako haurrei zuzenduta. Ordu erdiko bi saio egingo dituzte, 17:30ean eta 18:15ean hasita.

Horrez gain, helduentzako saioak ere izango dira, otsailaren 26an, Soledad Felloza ipuin kontalari uruguaitarrak La vida es un cuento saioa eskainiko du eta martxoaren 5ean, azkenik, Kolonbiatik etorritako Nicolas Buenaventurak Maestra palabra ipuina. Azken bi saio horietarako txartelak otsailaren 16tik aurrera eskuratu ahal izango dira udal webgunean eta Txokolateixan.

Arantzazu Ibarrondo udal liburutegiko zuzendariak azaldu du urtean helduentzako ipuin kontaketa saio bat edo bi antolatu ohi dituztela; izan ere, “askok uste dutenaren kontran, ipuin kontaketa ez dago soilik haurrei zuzenduta”. Helduentzako saioetan parte hartzen duen publikoa “fidela” izaten da: “Programa honetan parte hartuta ere izango dugu istorioak entzuteko aukera, eta horretarako gogotsu gaude”. Hala eta guztiz ere, osasun krisiaren eraginez, saioak liburutegiko erakusketa gelan egingo dituzte, eta edukiera mugatu egingo dute: “Aztertzen ari gara zenbatentzako lekua izango dugun”.

Etiketak: