Arrasaten, Naturan Jolasean ekimenaren baitan, ibilbide bat egiteko aukera izan dute hainbat familiak. Herriko landareak, loreak edota zuhaitzak ezagutzeko aukera izan dute bertan, eta horiek izendatu ere egin dituzte, herritarrek jakin dezaten zein den bakoitzaren izena.

Seigarren urtez antolatu dute Naturan Jolasean ekimena, Arrasaten. Aurten talde hauek ibili dira eguneko egitaraua antolatzen: Leintz Eskola Kirola, Besaide Mendi Elkartea, Gaztetxeko Guraso eta Haur Asanblada eta Txatxilipurdi Elkartea.

Maiatzaren 1a plazan hasi dute aurreikusita zeukaten ibilaldia. Eta Ingurumen Eskolako irakasle Naiara Corcueraren gidaritzapean, haurrek zein gurasoek, askotariko landareak, loreak eta zuhaitzak izendatu dituzte. Batzuentzat, asko ezagunak ziren, beste batzuendako, berriz, egunero ikusten dituzten landareak edo zuhaitzak izan arren, berriak izan dira horien izenak.

Haur zein heldu, guztiek izan dute naturaz gozatzeko eta naturarekin ikasteko aukera. Izan ere, hori da egunaren helburu nagusia: natura errespetatzea, naturaz gozatzea eta duen balioa kontutan hartzea.

Gaztetxoek egurrekin, kartoiekin edota pinaburuekin egindako artelanak ere eraman dituzte ibilbidea amaitu den Santa Barbara Azpi natura eremura, eta horiek zuhaitz batean zintzilikatuta ere jarri dituzte.