Iritsi dira bi hauek. Desmuntatu dizkidate teoria guztiak. Guraso bezala estrenatu naiz. Denbora eta lasaitasuna falta zaizkit. Ikasi, irakurri eta ikusitakoak balio izan dit. Batzuetan. Eskerrak. Beste hainbatetan zentzua galtzera eraman nau. Zer polita eta erraza den dena “de libro” doanean. Eta ez badoa…?  Hortxe errealitatea.

Hitz egin izan dugun bezala, haurtzaroko 0-3urte tartean, elikadurak berebiziko garrantzia dauka; haurraren osasuna mantendu eta sustartzeko, jakien aurrean jarrera egokia lantzeko garaia delako, esperimentatzeko, organismoak jakiekin lehen kontaktua izango duen unea delako, familia kideekin mahi inguru sano bat sortzeko, psikomotrizitate fina lantzeko aukera eskaintzen duelako, …. Eta hori guztiagatik, ondo egin nahi dugu.

Hala ere, praktikan jartzerako garaian  horren erraza ez dela esperimentatu dut. Hortaz konturatu naiz. Orain arteko kolaborazioetan konpartitu dizuedanean sinisten dut, bai, baina MALGUTASUNAren garrantzia azpimarratu nahiko nuke. Malgutasuna otordu kopuruetan, malgutasuna jakiak aurkezten, malgutasuna edoskitze metodoan, malgutasuna haurraren jakiekiko preferentzi aldakorrean, malgutasuna mahaian, malgutasuna bikotearekin, malgutasuna norberarekin, malgutasuna…

Guraso zarenean bada zerbait ezberdina, zure jokaeran (erantzukizunaren pisuak, ardurak, beldurrak, ez jakintasunak, babes faltak, dudak, nekeak, ingurukoekin konparatu izanak, ….  eraginda agian) eta ez da horren erraza ondo zabiltzala sinestea. Halaber, norberaren eta txikitxoen gaitasunean konfiantza izatea. Beraz, ezinbestekoa eta garrantzitsua iruditzen zait osasun sailetatik jasotzen dugun informazio, aholku, interbentzio eta pautak egokiak izatea. Egin behar den eskuhartzea benetan probetxuzkoa izateko. Haurren zein bere familiaren elikadura eta osasuna egokiak izan daitezen alegia.

Baliteke ondorengo hitzek kritika tankera hartzea, baina beharrezkoa zait komentatzea norbaiti balio badio edo identifikatuko balitz, lasaitzeko. Guraso izatearen pack-ari orokorrean osasun publikoko pediatria zerbitzuak elikaduraren inguruan duen informazio ez eguneratua eta gai honi eskainitako denbora tarte pobrea gehitzen badiogu… ulertu dezaket hainbat gurasoren buruhauste, bakartasun, eta ezer ez ulertzearen  sentsazioa eta gai honetan.  

Pediatraren kontsultak haurraren osasunaren eta garapenaren inguruko lehen kontaktuak dira, gurasotasuna den une delikatuan (hare gehiago COVID-19aren garai honetan). Hartatuko gaituzten profesionalengan konfiantza izatea ezinbestekoa dela iruditzen zait. Horretarako, hauek informazio eguneratua maneiatzea ezinbestekoa da. Berauek daramate gure haurren hazkuntzaren kontrola. Bidelagun ditugu. Beraz, eskaini beharko liguketen informazio zein laguntza batukaria izan beharko da elikaduran ere. Era berean, haur zein familia denak saku berean (goiztiarrak, garapen erritmoaren arabera, osasun arazo konkretua dutenak, alergia kasuak, familia monoparentalak, bikien familiak,…) sartu gabe hartatu beharko ligukete. Hots, tratua eta aholkuak pertsonalizatuak (edo pertsonalizatuagoak) behar lukete izan. Izan ere, guztioi filtro berberak aplikatzeak izan ditzaken ondorioak potoloak izan daitezke: ama edoskitze bat goizegi etetea, edoskitze artifiziala kulpabilitatearekin eramatea, edoskitze artifizialerako edozein esne artifizial erabiltzea, haurraren jate erritmoak ez errespetatzea, pisuaren eboluzioan zentzurik ez duen ardurak izatea, haurraren elikatzeko gaitasuna gutxiesteak, elikagai osasuntsuak ez lehenestea …

Nere kasuan (eta gertukoetan) informazio falta potolo bat, hutsune bat, somatu dut elikaduraren inguruan: alergia kasuetan, alergenizitate sustantzien zerrendak ez izatea, jakiak osorik aurkezten badizkiegu itotze kasuetarako erraminta falta, haurraren platera zein elikagaik osatu behar duten, anemia kasuak saihesteko zein elikagai lehenetsi , haurrak urte bete betetzean izango duen elikadura nola maneiatu (formula esnea edo ama esnea jada ez da nutriente iturri nagusia? Ze frekuentziarekin eskaini behar zaio orain?..), urte betetik aurrera biberoia erabiltzen uztearen garrantzia (eta nola egin), … alegia.

Hala ere, hor nonbait badaude profesional miragarriak. Bai osasun publikoan edo hortik kanpo. Eta zorionekoak gu berauekin topo egin ezkero. Baina hemen ere malgutasunarekin jokatu beharko dugu. Hots, oreka bat bilatuz kontatzen digutenaren, sentitzen dugunaren, dakigunaren eta haurrak erakusten digunaren artean.

Baliagarri izan daitekeen 0-3urte tarteko elikaduraren gida baten erreferentzia eskaini nahi dizuet. Dietista-nutrizionistek sortua, pediatra zein pedagogoek lagunduta. Oraingoz, gaztelaniaz eta katalanez soilik aurki dezakegu.

Argazkiak: Maite Garitano