Jatorrizko Barbie beltzari omen eginez, eta hura berrinterpretatuz, Barbie panpinen bilduma sortu du Mattel konpainiak.

Dena den, panpin horiek eztabaida ekarri dute, izan ere, askorendako ez dute aniztasuna bere zentzu zabalean kontuan hartzen.

Goienak ostiralero argitaratzen duen Puntua aldizkarian gai horri buruzko lau iritzi jaso dira, eta hona ekarri nahi izan ditugu, zuengan ere gogoeta pizteko. Zer uste duzue, aniztasuna kontuan hartu dutela panpin horiek egiterakoan?

Hemen Puntua aldizkarian jasotako lau iritziak:

Mamadou Sarr, Ndank Ndank elkarteko kidea: “Positiboa da. Haurrek garapen afektibo osasuntsua izateko erreferentzia ereduak behar dituzte. Hala ere, oraindik asko dago egiteko. Gizarte mailan, hainbat lanbidetan eta komunikabideetan, pertsona arrazializatuen presentzia handitu beharra dago”.

Itsaso Pagoaga, hezitzailea eta Olgeta egitasmoaren sortzailea: “Gehiago dute estrategia komertzial eta marketinetik, jendarteko aniztasunari erantzuteko nahitik baino. Denek gorputz eredu bakarra islatzen dute, mendebaldar itxurakoa… Modeloen antz handiagoa dute, neskatila beltz errealena baino”.

Julen Romaratezabala, gurasoa: “Aniztasunak apur bat anitzagoa behar luke izan. Barbiek oinarria aldatu ezean, lortu ezinezko edertasun kanona elikatzen jarraituko du, errealitatetik oso urrun dagoena eta, hain zuzen ere, gorputzen aniztasuna ukatzen duena”.

Jone Arrazola, sare feministako kidea: “Benetton-ek ere erabili zuen. Aniztasuna ez da soilik azal kontua: arrazializatutako emakumeak zurien pareko ikusarazi nahi dituzte, baina iruditegi kolonialetik: “zibilizatuta”, Mendebaldeko janzkeraz, sexualizatuta eta gazte. Hil dezagun Barbie!”.