Naturan eta familian egiteko jarduera proposamenak: Ipuinak, bizikleta eta hostoak

Haurra osasuntsu hazi dadin, gutxienez hiru ordu eman behar ditu egunean aire zabalean jolasten. Hala dio Heike Freirek, aurten hamar urte bete dituen Berdean Hezi liburuan. Naturarekin interakzio zuzena duten haurrak erlaxatuago bizi direla eta adimen abstraktua, afektibitatea, gaitasun sozialak, autoestimua, sormena, enpatia… garatzeko lagungarri zaiela baieztatzen du.

Berdean hezi Liburua 2015. Urtean ekarri zuen euskarara Txatxilipurdi elkarteak Diego Martiartuk itzulita.  Liburuan,  heziketaz  eta honek naturarekin duen harremanaz idazten du Freirek. Guk, liburuaren 10. urteurrena baliatuta,    naturan gozatzeko 16 proposamen zehatz jaso ditugu, betikoak izan arren, ohiko izatea utzi diotelakoan.

Bestelako ideia eta proposamenak ere gustura jasoko genituzke. Seguru guraso, haur eta familia ezberdinen esperientzietatik ikas dezagula. Bidaliko diguzue zuen proposamena? Guk Igandetan naturan familian gozatzeko proposamen batzuk batuko ditugu.

10- Ipuinak kontatzea

Sutondoan bilduta eta ilunabarrez normalean, lasterka, saltoka eta denetariko ariketa fisikoak egiten ibili ondoren haurrak nekatuta daudela… horra hor une apropos askoa animalia, landare eta leku basatiei buruzko istorioak kontatzeko, izan ere, orduantxe pizten baitzaie haurrei hala abenturarako gogoa nola bizirik dagoen ororenganako enpatia. Esoporen fabuletatik hasi eta Andersenen ipuinetaraino, natura protagonista duten kontakizun ederrez gainezka dago gure kultura. Baina ingurunea, magia eta misterioz beterik dagoenez, inspirazio-iturri egokia izan daiteke haurrekin batera gure istorioak sortzeko.

11- Bizikletaz familian

Leku askotan txirrindularientzako ibilbideak egoten dira, bereziki egokituta eta seinaleztatuta, familia osoak lasai ibil daitezen. Ibilbide horietako gehienek paraje ederrak zeharkatzen dituzte eta bista paregabeak egoten dira, begietarako ezinago eder. Naturaren soinu, usain eta paisaiez zentzuzko abiaduran gozatzeko, ariketa fisikoa egiteko eta sasoi onean egoteko pentsatuta daude ibilbideok.

12- Hostoak bildumatzea

Udazkenean batez ere, ahalik eta hosto desberdin gehien biltzera joan zaitezkete: zuhaitzen eta zuhaixken hostoak, landare igokarienak, loreenak. Ondoren, hostoak identifikatzera jolas zaitezkete, edo bestela, benetako nahiz asmatutako kategorien arabera sailka ditzakezue, esate baterako: biribilenak, horienak, leunenak… Jarduera hau egiteko ez duzue zertan oso urruti joan, nahikoa da etxetik hurbil dagoen parke batera jotzea.