Leire Azpiazu erizainak haurrak gidaturiko elikadura edo Baby Led Weaning-ari buruz jardun da Puntua aldizkarian. Bertan idatzitakoak ekarri ditugu gurera.

“Betidanik, haurrek, edoskitze etaparen ostean, etxean zegoen jana jaten zuten. XIX. mende amaieran hasi ziren haurrei egokituriko lehen elikagaiak sortzen. Ordura arte, ohikoena haurra amaren altzoan jarri eta elikagaiak amaren plateretik zuzenean ematea zen. Alegia, gaurko Baby Led Weaning-a (BLW) edo haurrak gidaturiko elikadura dena”.

Moda bat al da?

Aipatu dugun bezala, XIX. mende amaierara arte ez zegoen haurrei egokituriko elikagairik eta lehen batidora 1908an sortu zen eta jatetxeetarako zuzenduta egin zen. Beraz, argi dago horiek etxetara iritsi arte eta berauek sortu arte, umeek ez zutela purerik jaten. Haurrak altzoan jarri eta zegoena ematen zitzaien, seguruenik, sardexkarekin zapalduko zuten elikagai batzuk eta bigunenak, agian, zatika eskainiko zizkieten.

Beraz, ez, BLW-a ez da gaur egungo moda bat.

Haurrak gidaturiko elikadura

Haurra bere kabuz elikatzea eta hark beharren arabera zein elikagai eta zenbat jango dituen erabakitzen uztea da haurrek gidaturiko elikadura. Horren inguruko azterketen arabera, modu honetan elikatutako haurrek ez zuten osasun arazorik erakutsi. Gizakiok gure mantenugaien arabera behar ditugun elikagaiak hautatzeko gaitasuna daukagu, baina horretarako aukera izan behar dugu.

Abantailak

Zeintzuk dira elikagaiak horrela eskaintzearen abantailak? Amagandiko edoskitzea mantentzen laguntzen du. Metodo naturalagoa, lasaiagoa eta atseginagoa da. Haurrari elikagaiak ezagutzen uzten dio. Modu autonomoan elikatzeko aukera. Pertzepziozko elikadura bultzatzen laguntzen du, gose eta asetasun-seinaleetan oinarrituta. Mugimendu-garapenari eta koordinazioari laguntzen dio. Janari osasuntsuarekiko lehentasuna. Ohitura osasungarriak sustatzeko estrategia ona. Familiaren dieta hobetzeko aukera ona izan daiteke.

Kezkak

Abantailak ikusi ondoren, familia askok metodo hau egin nahi dutela garbi edukitzen dute, baina, era berean, kezka batzuk agertzen dira. Eztarri- trebaketa bat izatea da kezkarik nagusiena, baina baita haurra egoki elikatuta izatea ere; burdin gabeziarik ez izatea, alegia.

Eztarri-trebaketa arriskua ez da elikagaiak horrela eskaintzearren handitzen. Baina garrantzitsua da horretarako testura eta neurri egokian elikagai guztiak eta era egokian aurkeztuta. Esaterako, azenario edo sagar bat ezingo diogu gure haurrari gordinik eman, eta, azenarioaren kasuan, ezta ere diru tamainan. Horiek eztarri-trebaketaren arriskua handitzen dutelako. Bestalde, fruitu lehorrak ezin dira 3 urte bete arte osoan eskaini, baina txikituta edo krema eran eskaini ahal izango dira. Baina gogoratu eskaintzen den metodoak ez duela eztarri- trebaketaren arriskua igotzen. Pureak jaten dituen haur bat gainbegiratu gabe badago, eztarri-trebaketa izateko arriskua izango du.

Burdinaren gabezia ekiditeko, haurrari mineral horretan aberatsak diren elikagaiak eskaintzea izango da prebentzio onena. Baina, ikerketen arabera, haurrak gidaturiko elikaduran ez da gabezia hori izateko arriskua handitzen.

Garrantzitsua da baita ere haurren beharrak errespetatzea. Ez badu jana bukatzen, ez zigortu edota ez behartu guztia jatera. Hark badaki zenbat jan behar duen, eta haiengan konfiantza izan behar da.

Goiztiarra bada

Zure haurra goiztiarra bada, ez dago gomendio garbirik, baina Espainiako Pediatren Elkarteak uste du egokia dela zuzendutako 6 hilabetetan hastea, dauden ebidentzien arabera. Hala ere, indibidualki ikusi beharko da eta pediatrak emango ditu bakoitzarentzako egokiak diren gomendioak. Garaian jaiotako haur baten gomendio berekin hasiko du elikadura osagarria.