Bihotz Berdeak programak bi urte bete ditu eta datorren ikasturteari begira interesa duten 12-15 urte arteko gazteen zerrenda osatu nahi du.

Programaren xedea da gazte natur zaleen 20 kideko taldea osatu eta talde-gidari batekin zein natur gaietan aditu batekin naturara hurbiltzea. Adituak izan daitezke herpetologoak, ornitologoak, mikologoak, superbibentzia aditua, arrastoetan aditua… “Modu honetan gazteen natur jakintza nahia modu oso praktiko batean ase eta natur arlo berrietara ateak ireki nahi dizkiegu, Gipuzkoan natur zale mugimendu bat sortuz eta natur zale berezkoak diren gazteei, aisi aukera dibertigarri eta hezigarri bat eskainiz, lagun berriak eginez naturaren erdian”, azaldu dute.

Datorren ikasturteari begira etorkizuneko Bihotz Berdeak izan litezkeen gazteak identifikatu nahi dituzte. “Honela bada, zure familian inguruan natur zaleak diren gazteak badituzu, gurekin harremanetan jartzeko aukera berauei eskaintzea eskertuko genizuke”, egin dute dei.

Informazio gehigarria aurreko edizioko programazioan aurki daiteke. Buletinera harpidetza egiteko aukera ere badago esteka honetan.