Urtez urte gero eta ikastetxe gehiago biltzen ditu Eskoletako Urmaelen Sareak eta haien arteko saretzea eta elkarlana errazten du horrek. Helburua da urmaelen erabilera didaktikoa sustatzea eta ikastetxeen arteko saretzea, elkarlana eta trukaketa bultzatzea.

Berriki egin dute sarearen V. topaketa eta iaz sortutako Eskoletako Urmaelen Sareko Batzordearen. Bertako partaide dira Aranzadi Zientzia Elkartea, Berritzegune Nagusia, EHU, neiker eta Euskal Herriko lau ikastetxetako ordezkariak. Batzordearen lanari esker ahalegin berezia egin da zientziaren didaktikan. Hain zuzen ere, V. topaketak urmaeletako erabilera didaktikoetan jarri du azpimarra.

Topaketan irakasleentzako hainbat formazio eskaini zuten, ondoren ikasi duten guztia ikastetxean zabaldu eta ikasleekin martxan jartzeko. Azken urte honetan, ahalegin berezia egin da zientziaren didaktikari buruzko ikastaroak eskainiz. Izan ere, sareak berak bultzaturiko ikerketa batek ondorioztatzen duen bezala, urmaela laborategi natural paregabea da zientziaren konpetentzia ikasleekin lantzeko.

Horrez gain, ordea, biodibertsitateari buruzko lanketa bultzatzeko, edota alfabetatze ekologikoari buruzkoak sustatzeko eremu aproposa da, bai eta hezkuntzan landu beharreko konpetentziak garatzeko ere.

Erabilera didaktikoa eta inpaktua gizartean

Elkar ezagutza, parte-hartzea eta elkarlana bultzatzeaz gain, topaketak indar berezia jarri nahi
izan du urmaelean bertan egiten diren jardueretan eta erabilera didaktikoan. Hain zuzen ere, batzordeak ikasturtean zehar egindako hausnarketa aurkeztu du, Eskoletako
Urmaelen Sareak gizartean izan duen inpaktua azaltzeko. Azken urteetan ikerketaren lerroak ere
pisu handia hartu du sarean, eta EHUren bitartez, hainbat publikazio eta hitzaldi eman dira
nazioarteko kongresuetan. Helburua da ikerketa horien emaitzak, era berean, ikastetxeen
egunerokoan lagungarri izatea, erabilera didaktiko egokiago bat egiteko.

Urmaela duten ikastetxeak

Eskoletako Urmaelen Sarea (EUS) urmaela edo aintzira duten eta horien erabilera didaktikoa
egiten duten ikastetxeen sarea da. Lehenbiziko urmael didaktikoa 2013an egin zen eta zazpi
urteren buruan sarea sortu zen. Ordutik, urtez urte, handitzen joan da sare hori, egungo 50
ikastetxeko kopurura iritsi arte. Ikastetxeez gain, alabaina, Euskal Herriko Unibertsitateko (EHU)
hiru Campusek ere parte hartzen dute.

Urmaelak ekosistema bereziak dira, azken urteetan beherakada oso handia jasan dutenak. Hori
dela eta, hezegune txiki horiek sortzean, naturarekin justizia egiten da: gizakiak desagerrarazi
zuena, gizakiak berreskuratzen baitu. Urmaelak auzolanean sortzen dira adituen jarraibideak
jarraituz eta hezkuntza komunitate osoaren parte-hartzea ez ezik, leku askotan herritarren parte-
hartzea ere bultzatzen da, beti ere ikasleetan arreta berezia jarriz.

Urmaelen Sarearen webgunea: https://www.urmaelaeskolan.eus/orri-nagusia