Bai, elikadura gurasotasunean ere bada puntu kritiko bat. Izan ere, haurraren etorrerak bizitzan dardara sortzeaz bat, hauen heziketak lehentasunen berrantolaketa bat eskatzen du. Elikadura arlo potolo bat izanik. Nabaria da berrantolaketa horretan zaurgarriak garela. Izan ere, ezjakintasun, beldur eta influentziek eragin handia daukate hartuko ditugun erabakietan.

Egoera hortaz baliatuko dira berriz ere hainbat “marka”. Beharrezko ez ditugun produktuak beharrezko bihurtzen alegia. Gure haurren hazkuntza eta osasun egoera baitago jokoan.

Deigarria da nutrizio arloko profesionalen eskutik elikagai superfluo (ez funtsezko) bezala izendatuak izan diren jakiak iragarkietan (sare sozialetan, tv, jakien ontziak, …) daukaten presentzia eta hauei atxikitzen zaizkien ekarpen nutrizional mesedegarriak.

Adibidez, D bitaminan aberatsa den izozkia, kaltzio ekarpen extra duen zaporezko jogurt edangarria, bitamina iturri diren gosariko zerealak, inmunitatea indartuko dion esnekia, landare jatorriko koipeekin egindako gailetak, … Ikuspegi nutrizionaletik kontrajarriak diren kontzeptuak dira. Nola liteke, funtsezkoa ez den jakia osasuntsu edo beharrezko bezala aurkeztea interesatzen den ekarpen nutrizional bakarra kontuan izanik? Jaki horrek bere osotasunean eskaintzen diguna kontenplatu gabe.

Aipatutako eredu hoietan adibidez, goraipatzen diren nutriente horietaz gain, beharrezko ez dituzten zein onurarik eskainiko ez dizkioten azukre edo gehigarriak ere emango dizkiote. Hala ere, arazoa ez da soilik sustantzi horien ekarpena, baizik eta jaki hauek hautatzen ditugun momentutik  bestelako elikagaiak (fruta, gazta, jogurt  naturala, …) jateko aukera desplazatzea.  

Egia da industriaren azpi joko hau ez dela haurren elikadurara mugatzen. Ohikoa da jokaera hau, batez ere, behar espezifikoak suposatzen dituzten garaietan.  Adibidez menopausia, haurdunaldia, zahartzaroa, kirol arloa,… Etapa hauek zaurgarriak bilakatuz industriaren aurrean.

Gurasotasunera bueltatuz, haurren adinaren arabera mezu eragileak eta promozionatuko diren jakiak ezberdinak izango dira. Adibidez nerabezaroan,  hauen elikadura gure menpetik urruntzen doan garaian, bidaliko duten  mezuak oso konkretuak izango dira. Zuzenean nerabeei beraiei zuzendutakoak. Ez dira hazkuntzarekin lotutakoak izango, baina bai  irudi fisikoarekin edo kirol errendimenduarekin lotutakoak adibidez.  

Iragartzen diren kontzeptu hauek benetan berebiziko sustraiak barneratzen dituzte gutako bakoitzean. Izan ere, zailtasun handiak izan ditut funtsezko ez diren jaki hauek ez ditugula beharrezko eta nola ez, nahikoa izan daitekela gure behar nutrizionalak (orokorrean) elikagaiekin soilik asetzea ulertarazten laguntzen.

Iragarkiak gezurtatzen ibiltzea baiño horra trikimailu errax bat: iragarkia behar duen jakia ez da beharrezkoa gure elikaduran sartzea osasun egoera hobetzeko edo hazkuntza seguru baterako. Izan ere, zenbat iragarki daude fruta fresko aleena, garbantzu gordinena, arrain freskoarena, arrautzena, intxaurrena, … ??