Euskara eta kulturartekotasuna egitasmoa, Zaldibiako Lardizabal eskolan, 2021-2022 ikasturtean jarri zuen martxan Udalerri Euskaldunen Mankomunitateak, Mondragon Unibertsitateko Humanitate eta Zientzien fakultateren laguntzarekin. Ordutik, proiektua hazten joan da eta gaur egun UEMAko kide diren 31 herritako 45 ikastetxetan ari dira lantzen.

Horregatik, egitasmoaren nondik norakoak biltzen dituen 128 orriko koadernoa argitaratu dute, “ikastetxe horiei proiektuaren inguruko oinarrizko informazioa ahalik eta ulerterrazen emateko”. UEMAk adierazi duenez, “koadernoak lan-tresna izaera dauka”, eta hezkuntza-komunitateetan proiektua gidatzen duten talde eragileak “autonomiaz erabiltzeko” baliagarria da.

Horrenbestez, bertako edukia “baliagarria” da proiektuan parte hartzen duten ikastetxeetako ordezkarientzat, irakasle eta hezitzaileentzat, familia elkarteetako kideentzat eta udaletako ordezkari eta teknikarientzat, azaldu du UEMAk. Koadernoan aurkitu daitekeen edukiaren laburpen bat irakurri daiteke hemen klikatuz.