Maiatzaren 10ean egingo dute 2026ko aldia, Gipuzkoan Etxean edo parkean, harremanak elikatzen! lelopean. Jatorri ezberdinetako pertsonak mahai baten inguruan elkartzea da dinamikaren funtsa eta bazkari partekatuen bidez elkar ezagutza eta gizarte kohesioa sustatzea.

Aurtengo edizioak bultzada berezia eman nahi dio gizarte-sentsibilizazioari, bereziki gazteen artean. Halaber, ekimena oso interesgarria izan daiteke familientzako. “Edizio honek iaz hasitako aldaketa sendotzea du helburu, ospakizuna udaberrira aurreratuz eta parte hartzeko espazioak zabalduz”, azaldu dute bultzatzaileek –Gipuzkoako Foru Aldundia eta SOS Arrazakeria–. “Horrela, etxeez gain, ekimena parkeetara eta elkarte gastronomikoetara ere ireki da, parte-hartzea zabalagoa, malguagoa eta eskuragarriagoa izan dadin”.

Eragin soziala duten keinu txikiak

Antolakuntzatik azpimarratu da gizartearen konplexutasuna handitzen ari den eta desberdintasunak areagotzen ari diren testuinguru honetan, ezinbestekoa dela bizikidetza indartuko duten topaguneak sortzea. Ildo horretan, nabarmendu dute arrazakeriaren eta diskriminazioaren aurkako borroka egunerokoan ere eraikitzen dela, bazkari bat partekatzea bezalako keinu txikien bidez, konfiantza eta ulermena sustatzen lagundu baitute.

Gazteen inplikazioa eta gizarte-sentsibilizazioa

Gorroto diskurtsoak ugaritzen ari diren garaiotan gazteen aktibazioaren beharra ikusten dute bultzatzaileek eta ikus-entzunezko bat ere aurkeztu dute, elkar ezagutzeak eta bizikidetzak harreman inklusiboagoak eraikitzen lagundu dutela agerian utziz.

Ekimena, aurten ere, lurraldeko hainbat eskualdetan garatuko da: Donostialdea, Tolosaldea, Buruntzaldea, Oarsoaldea, Bidasoa, Debagoiena eta Urola Garaia.

Parte hartzea eta izen ematea

Interesa duten pertsonek izena eman behar dute aldez aurretik hemen. Hiru parte-hartze modalitateen artean aukeratu behar da: anfitrioi gisa, parte-hartzaile gisa edo dinamizatzaile gisa. Izena emateko epea maiatzaren 1era arte egongo da zabalik.