Azken lau asteetan, kolorea, forma eta irudimena izan dira protagonista Sorginorratz ekimeneko gazteen artean. Arte plastikoen munduan buru-belarri aritu dira, Oier Fernandez artista eta Kaleko Izarra grafitilariarekin batera aritu dira irudiaren eremuko saioetan.

Tailerrak lau saiotan banatu dira, eta parte-hartzaileek sormen prozesu osoa bizitzeko aukera izan dute: ideiatik abiatuta, diseinua landu eta azken emaitzara iritsi arte. Koloreekin eta formekin jolasteaz harago, arte plastikoek eskaintzen duten askatasuna eta esperimentazioa izan dira ardatz.

‘Haurren hiria’ kartoi gainean

Lehen hiru saioetan, Oier Fernandezen gidaritzapean, gazteek herri ideal baten maketa sortzeari ekin zioten. Proiektua orri zuri batean abiatu zen: bakoitzak bere herriko txoko kuttunak marraztu zituen —kioskoa, igerilekua edo futbol zelaia–; amets egiteko tartea ere izan zuten, espazio horiek nahi bezala eraldatzeko.

Papereko ideiak hiru dimentsiotara eramateko unea iritsi zenean, kartoi zatiek hartu zuten protagonismoa. Xoxote mendia maketan txertatuta, igerilekua duen goxoki-denda edota Azpeitiko kioskoaren bertsio berritua sortu zituzten, beste hainbat proposamenekin batera.

Espraiekin jolasean

Laugarren eta azken saioan, berriz, kaleko artea izan zen ardatz, Kaleko Izarra grafitilariaren eskutik. Hasieran, grafitiaren estilo eta teknika ezberdinak ezagutu zituzten, eta ondoren paperean praktikan jarri.

Amaitzeko, gazteak kalera atera eta grafiti erraldoi bat sortzera animatu ziren. Espraien bidez koloreak nahastu eta formekin jolastuz, mezu argi bat utzi zuten horman: “Maitasuna”.

Irudiaren eremua landu ondoren, Sorginorratz ekimeneko parte-hartzaileek jada gorputza, soinua eta irudia esploratu dituzte. Aste honetan, ordea, beste jauzi bat egingo dute: hitzaren munduan murgilduko dira, bertsolaritza saioen bidez.

Sorginorratzak ekimenaren helburua da, kultur sormen praktikak gazteengana hurbiltzea, eta aldi berean, ikastetxeetako hezkuntza eskaintza osatu eta aberastea. Antolatzaileen esanetan, esperientziak utzitako arrastoa nabaria da: “Irudimena martxan jartzen denean, edozein mundu eraiki daiteke”.

Arte plastikoen tailerretako irudi gehiago hemen dituzue ikusgai.