Duela urtebete estreinatu ostean eta ikasturtean zehar prestaketa lanak egin ondoren, Euskadiko Orkestrak Logelan logale izeneko ekoizpen propioaren bigarren edizioa eskaini du aste honetan –asteartean eta asteazkenean Donostiako Kursaal Auditoriumean egin zuten, eta gaur, apirilak 23 Gasteizko Jesus Guridi Kontserbatorioan–. Leire Bilbaoren libretoarekin eta Jagoba Astiazaranen jatorrizko musikarekin, mila haur baino gehiagok osatu dute Euskadiko Orkestraren inguruko abesbatza berria.

Datorren astean, apirilaren 28an eta 29an, Bilbao Orkestra Sinfonikoak hartuko du haur-kantataren lekukoa, eta, ondorioz eta estreinakoz, 3.000 ikasletik gorako kopurura helduko da kantata saioetan parte hartzen duten haurren zifra. Horrenbestez, bigarren edizio honek, lehenengoarekin alderatuta, antzezpen kopuruan gora egingo du. Euskalduna jauregian egingo dira Bilboko kantatak, 12:00etan.

Haurrengan eragin “positiboa”

Euskadiko Orkestrak ikastetxe parte-hartzaileetako irakasle eta ikasleen testigantzak jaso ditu. Testigantzetan jasotakoaren arabera, ekimenaren eragina “positiboa” da, “parte hartzen dutenen bizitzak eta dinamikak aldatzeraino”.

Logelan logale bezalako Euskara hutsezko haur kantata bat aurkitzeko, 1998. urtera arte egin behar da atzera: Tomas Araguesek konposatutako Jimmy Potxolo haur kantata, Bernardo Atxagaren letrarekin.

Eragile ugari

Kantata bat sortzeko, eragile askoren laguntza behar da eta giza mobilizazio handia eskatzen du.

Logelan logale-k, Maria Goiricelayak diseinatutako proposamen eszenikoa, Juanjo Oconek zuzendutako orkestra, eta Kepa Errasti abeslari eta aktorearen ipuinaren narratiba biltzen ditu. Eszenatokian, Euskadiko Orkestraren laguntza dute, baita haur abesbatza handiarena ere. Abesbatzak, alde batetik, lau abesbatza pilotu ditu –Easo Eskolania, Andoaingo Udal Musika Eskolako Abesbatza, Hernaniko Udal Musika Eskolako Abesbatza eta Zegamako Orkatz Txiki Abesbatza–. Bestetik, Lehen Hezkuntzako 5. eta 6. mailako 22 ikastetxetako ikasle-talde aritu dira; guztira 1.400 haur inguru. Aipatu bezala Bilbao Orkestra Sinfonikoak hartuko du Bilboko kontzertuen lekukoa, eta han ere Bizkaiko ikastetxeetako beste 1.700 ariko dira.