Zuzeneko musika eta Adimen Artifiziala uztartuko ditu Euskadiko Orkestraren Musika Familian kontzertuak. Ekoizpen berriak Arriaga bizi da izena du eta Juan Crisostomo de Arriaga musikagile bilbotarraren heriotzaren 200. urteurrenaren baitan kokatzen da. Emanaldian bere bizitzaren istorioa kontatuko da, baina alderantziz: hilerritik hasi -19 urte zituela hil zen– eta haurtzarora arte.

Honako hauek dira ekoizpeneko protagonista musikalak: Luken Munguira tenorra, Emilianoren ahotsean –Juan Crisostomo de Arriagaren osaba–, Ana Belen Garcia pianista eta Larraitz Oiartzabal Euskadiko Orkestrako biolinjolea dira. Mikel Cañada, Euskadiko Orkestraren Musika Gela hezkuntza- eta gizarte-zikloaren koordinatzailea da ekoizpen berri honen zuzendaria. Adimen Artifizialaren aplikazioa ACC Comunicacion agentziak egin du.

Kursaalen eta Felix Petiten

Momentuz bi emanaldi daude aurreikusita. Bata, Donostiako Kursaaleko Ganbera Aretoan egingo dute maiatzaren 9an, Kursaal Eszenarekin lankidetzan. Bestea, Gasteizko Felix Petite Antzokian, maiatzaren 10ean, Gasteizko Udalarekin lankidetzan. 6 eta 10 urte bitarteko haurrei zuzendutako ekoizpena da eta 50 minutuko iraupena du. Sarrerak hemen klikatuz eskuratu daitezke.