Adimen-gaitasun handiko ikasleen identifikazioa hamar aldiz handitu da Euskadin azken sei urteetan; 2019an erregistratutako 747 kasuetatik, 7.327 kasuetara igaro da. Datu horiek Bilboko San Mamesen maiatzaren 13 eta 14an ospatutako Adimen Gaitasun Handien garapena sustatu eskola inklusiboetan Nazioarteko I. Biltzarraren inaugurazioan eman zituzten ezagutzera.

Eusko Jaurlaritzako Hezkuntza Sailak eta Deustuko Unibertsitateak antolatutako topaketak nazioarteko adituak, hezkuntza-eragileak eta familiak bildu zituen, adimen-gaitasun handien arloan ikerketa eta hezkuntza-praktikak partekatzeko. Estatuko hainbat tokitatik iritsitako 400 parte-hartzaile baino gehiago elkartu ziren bertan

Hezkuntza arreta plana martxan

Hezkuntza Sailaren datuen arabera, gaur egun identifikatutako 7.327 ikasleetatik 4.513 SACI detekzio goiztiarreko sistemaren bidez hauteman dira, eta, beste 2.724 kasuak berriz, modu incidental batean identifikatu dituzte. Sistema hori Lehen Hezkuntzako lehen eta seigarren mailetan ezarri dute, ikastetxe publikoetan zein itunpekoetan.

Azaldu dutenez, aldaketa hori 2019tik martxan dagoen Adimen Gaitasun Handiko Ikasleentzako Hezkuntza Arretako Planaren barruan kokatzen da. Plan horren bidez “irakasleen prestakuntza indartu, identifikazio-protokoloak sistematizatu eta ikasleen beharretara egokitutako hezkuntza-erantzunak” garatu dira.

Bestalde, biltzarrean aurkeztutako datuen arabera, Lehen Hezkuntzako lehen mailan detektatutako prebalentzia %3,11tik %4,53ra igo da azken urteetan, eta Bigarren Hezkuntzan %4 inguruan mantentzen da. Hezkuntza sailetik diotenez, horrek lehen aldiz aukera ematen du “errealitate horren ikuspegi globalagoa eta doituagoa” izateko

Erreferente ugari

Biltzarrak nazioarteko erreferente ugari bildu zituen Bilbon. Horien artean daude Sylvia Sastre-Riba, Betsy McCoach, Adam Ogurlu edo Eleonoor van Gerven adituak. Jardunaldietan gaitasun handien neuropsikologia, hezkuntza inklusiboa, garapen sozioemozionala eta adimen artifizialaren erabilera izan zituzten hizpide.

Hezkuntza Sailak jakinarazi duenez, 2025-2026 ikasturtean 4.100 profesional baino gehiagok hartu dute parte gaitasun handiei buruzko sentsibilizazio eta prestakuntza ekintzetan. Etorkizuneko erronken artean aipatu zituzten Haur Hezkuntzatik detekzio goiztiarra indartzea, genero-arrakalak murriztea eta “salbuespen bikoitza” duten ikasleen identifikazioa hobetzea.