Goiena Telebistako Datuetatik Tiraka saioan, Hego Euskal Herriko gazteek musika eta podcastak entzuteko duten maiztasuna, modua eta helburuak izan dituzte aztergai. Horretarako, Ikusiker ikerketa taldeak otsailean kaleratutako Gazteak eta audio kontsumoa txostena abiapuntu hartu dute. Kopuru horiek testuinguruan jarri eta hobeto ulertzeko, Musika Bulegoko kideek ere hartu dute parte, besteak beste, programan. Saio osoa, esteka honetan klikatuz ikusi daiteke.

Musika, egunero

Saioan plazaratutako datuen arabera, gazteen %85ak egunero entzuten du musika, %11ak astean 2 edo 5 egunetan entzuten du, eta %1ak ez du musika entzuten. Maiztasunari dagokionez, gehienek 16-60 minutu artean entzuten dute musika (%36); 61-120 entzuten dutenak, aldiz, %30a dira. Musika 200 minutu baino gehiagoz entzuten dutenak %11 dira.

Plataformen artean, Spotify da erabiliena; %79,4ak erabiltzen du. Jarraian, Youtube dago, %14arekin, eta ,beste plataformetan dabiltzanak, %4,7a dira. Musika internet gabe entzuten dutenak, gutxiengoa dira; %1,7a besterik ez.

Gazteek gogokoen duten musika, Pop/Rock-a da; emakumeen %28,9ak eta gizonezkoen %23ak dute gustukoen. Regetoia ageri da bigarren postuan, eta, kasu honetan, gizonezkoak dira gehien entzuten dutenak: %21,2 eta %14,8a dira hurrenez hurren. Rap-a, Heavy Metal-a eta musika Elektronikoak osatzen dute genero entzunenen zerrenda.

Irratia, gero eta gutxiago

Bestalde, mugikorra da musika entzuteko erabiltzen den aparatuen artean jaun eta jabe; gazteen %92ak bide hori erabiltzen du. %4ak nahiago du ordenagailua, eta %1ak bakarrik du irratia biderik gogokoena. Horrekin lotuta, aipagarria da gazteen %40ak ez duela irratia entzuten –gizonezkoen %45ak eta emakumezkoen %36ak–.

Podcastak, modan

Azkenik, podcastak izan zituen aztergai Datuetatik Tiraka saioak. Gazteen %60ak entzuten ditu podcastak, eta horietatik %3k egunero egiten dute. Hilean podcast bat entzuten dutenak %39 dira, astean behin entzuten dutenak %17, eta astean bi, hiru, lau edo bost aldiz egiten dutenak %11.

Entzuten dituzten podcast gehienak, elkarrizketak dira; %41,5a, hain zuzen. Emakumeek, elkarrizketa formatu hori, umore, komedia edo influentzerrek egindakoak gizonezkoek baino gehiago entzuten dituzte. Gizonezkoek aldiz, nahiago dituzte Albisteak, politika eta kirola bezalako gaiak. Eta zertarako entzuten duten galdetuta, inkestatukoen %50ak dio entretenimendurako egiten duela; %28ak gauza berriak ikasteko helburua du, eta %10ak beste gauza batzuk aldi berean egiten dituen bitartean entzuten ditu.