Ttap aldizkariak Irune Bengoetxea pedagogoa (Iruñea, 1998) eta Maialen Ariz arkitektoa (Iruñea 1996) elkarrizketatu ditu ikastetxeetako patioak eta hirietako zenbait eremu birnaturalizatzeko prozesuaren inguruan.  

Bertan, Bengoetxeak patioa eta ikastetxea bera, hezkuntzaren zati direla aldarrikatu zuen: “Gure filosofia da ulertzea hezkuntza dena dela, bi espazioak direla bat. Eskola kanpora ateratzea da helburua, hezkuntzan eta garapenean txertatzeko”. Arizek, bestalde, arkitekto bezala “Txikiei natura gerturatzeko zor eta aukera bat bezala” ikusi zuen prozesua.

Biek ala biek, patioen eredu berri honen onurak nabarmendu zituzten. “Hezkidetza ikus daiteke futbola erdigunetik kenduta. Horretara jolasten ez ziren haurrek espazioa irabazi dute, neskak, gehienak”, zioen Bengoetxeak. “Aldaketa klimatikoari dagokionez ere, aukera dago patioetan obrak eginez, auzo guztietan gune berdeak sortzeko eta bero irla horiek saihesteko”, esan zuen Arizek. Elkarrizketa osoa hemen klikatuz ikusi daiteke.