Espainiako narratzaile elkarteak (AEDA) udako ahozkotasun jardunaldiak egin ditu Oñatin. Jardunaldiok hamaikagarrenez antolatu dira, baina estreinakoz izan dira Euskal Herrian, eta jatorri eta profil askotariko profesionalen eskutik, hitzaldiak, mahai-inguruak eta tailerrak izan dira aukeran. Ipuin kontalariak, liburutegietako langileak, irakasleak… ahozkotasuna eta literatura uztartzen dituzten lanbideetakoei zuzendutako edukia partekatu dute, oro har.

Horrez gain, elkarteak antolatutako udako eskola ere Oñain egin dute: Arantzazun, zehazki. Espainiatik eta Euskal Herritik etorritako 50 ipuin kontalari profesional eta amateur inguru elkartu dira bertan. “Eskola hau oso garrantzitsua da guretako, aukera ematen digulako urtean behin, behintzat, elkartzeko”, zioen eskola guztietan parte hartu duen Dorleta Kortazar eskoriatzarrak. Bestalde, helduentzako hiru ipuin-kontaketa saio ireki ere egin dituzte astean zehar.