Teknologia ez da etorkizuna; oraina da. Mugikorrek, sare sozialek, adimen artifizialak eta ikus-entzunezko plataformek gure seme-alaben egunerokoa zeharkatzen dute. Baina, horiekin batera, galdera ugari ere sortzen dira: nola babestu gure datuak? Zer aztarna uzten dugu Interneten? Nola eragiten digute sare sozialek? Ba al dago teknologiaren erabilera bidezkoago eta burujabeagorik?

Galdera horiei erantzuteko ez dago errezeta magikorik. Baina badago elkarrizketarako, hausnarketarako eta ikaskuntzarako bidea. Horixe da Digitalizazio Arduratsua egitasmoaren abiapuntua.

Egitasmoa APIKA STEAM Laborategiaren baitan garatu da. Iametzak sustatutako proiektu honek Euskal Herriko gazteen artean gaitasun zientifiko eta teknologikoak sustatzea du helburu, betiere ikuspegi kritiko eta sortzailea ardatz hartuta. Oraingo honetan, erronka ez da tresna digitalak erabiltzen ikastea bakarrik; tresna horiek nola eta zergatik erabiltzen ditugun ulertzea ere bada.

Horretarako, DBHko 1. eta 2. mailako ikasleei zuzendutako sekuentzia didaktiko bat prestatu dute. Proposamenak ikasgelan landu daitezkeen hainbat gai biltzen ditu: datuen babesa, identitate digitala, sare sozialen erabilera, hizkuntza gutxituen presentzia ingurune digitalean, emakumeen lekua teknologian, kutsadura digitala edo alternatiba digital burujabeak, besteak beste.

Materiala sei eduki-bloketan antolatuta dago, eta bloke bakoitzean hiru saio proposatzen dira. Hala ere, baliabideak malguak dira, eta irakasle bakoitzak bere testuinguruaren eta beharren arabera egokitu ditzake.

Digitalizazio arduratsua, ordea, ez da eskolaren ardura bakarrik. Familiek ere egunerokoan aukera ugari dituzte gai horiek lantzeko: pantailen erabilerari buruz hitz egitea, sare sozialetan gertatzen denaz interesa erakustea, pribatutasunaz hausnartzea edo teknologiaren alternatiben inguruan elkarrizketak sustatzea. Hezkuntza digitala ez baita arau-zerrenda bat; pentsamendu kritikoa, autonomia eta erantzukizuna eraikitzeko bide bat baizik.

Egitasmo hau Gipuzkoako Foru Aldundiko Ekonomia Sustapeneko, Landa Inguruneko eta Lurralde Orekako Departamentuaren laguntzarekin garatu da, eta lehen esperientzia pilotua Arizmendi Ikastolarekin egin dute. Aurrera begira, Iametzaren asmoa da Euskal Herriko ikastetxe gehiagotara zabaltzea.

Horregatik, sortzen diren material guztiak Creative Commons BY-SA lizentziapean argitaratuko dituzte. Baliabide irekiak izango dira, edonork kontsultatu, erabili eta egokitu ahal izan ditzan.

Azken finean, helburua ez da gazteek teknologia gehiago erabiltzea, baizik eta teknologia hobeto ulertzea eta modu kontziente, kritiko eta burujabean erabiltzea. Etorkizun digital osasuntsuago bat eraikitzen gaur hasten baikara.