Oinherri elkarteak ikasturte berria abiatu du, azken urteetan sendotu duen dinamikari jarraipena emanez. Euskal Herriko Herri Hezitzaileen sarearen parte diren 50 udal eta 20 bazkide sustatzailek osatzen dute egitasmoa. Haien guztien arteko amets kolektibo gisa definitzen dute Oinherri, eta sarean garatzen diren egitasmo hezitzaile guztien aterki izan nahi du elkarteak. Guk Maite Azpiazurekin hitz egin dugu ikasturteko erronken berri izateko.

Urtez urte, herri hezitzailearen ikuspegitik hainbat gai lantzen dituzte, bai maila teorikoan, baita praktikoan ere. Besteak beste, haurren parte hartzea, aisia hezitzailea, hirigintza hezitzailea, kultur hezkuntza komunitarioa eta iritsi berrien harrera izan dituzte aztergai.

Ildo horretan, ikasturte honetako berritasun nagusietako bat Oinherri Eskola da. Elkartearen jardunaren inguruan sortzen den ezagutza eta esperientzia transmititzeko asmoz sortu dute, eta lehen saioa Agurainen egin dute. Herri Hezitzailearen inguruko oinarrizko prestakuntzaren bidez, Oinherriren balioen inguruko markoa eta horiek praktikara eramateko metodologiak partekatu dituzte bazkide sustatzaileetako kideekin.

Oinherri Eskolak bi lan-ildo izango ditu. Alde batetik, bazkide sustatzaileetako hezitzaile-kideentzako prestakuntza-plana garatuko dute; bestetik, sarearen parte diren herrietako kideentzako prestakuntza eta bidelaguntza eskaintza landuko dute. Asmoa da eskola urtero errepikatzea, kide berriei Oinherriren oinarriak ezagutarazteko eta gainontzeko partaideekin prestakuntzan sakontzen jarraitzeko.

Bigarren saioari ere forma ematen ari dira dagoeneko. Herrietarako prestakuntza eta bidelaguntza uztartuko dituen zerbitzu bat izango da, eta aurten hainbat esperimentazio-prozesutan probatuko dute. Datorren ikasturtetik aurrera, berriz, sareko edozein herriren eskura egotea da Oinherriren asmoa.

Kultur hezkuntza komunitarioa, lan-ildo berriaren ardatz

Prestakuntzarekin batera, Oinherrik lan-ildo berri bat ere jarri du martxan Artaziak kooperatibarekin elkarlanean: kultur hezkuntza komunitarioa. Lanaren helburu nagusia herritarrek dituzten kultur eskubideak mahai gainean jartzea da, baina baita herri hezitzailearen ikuspegitik kultura eta euskal kultura definitzea ere.

Horrez gain, kultur eskubideak herrietan praktikara eramateko eman daitezkeen pausoen proposamena prestatzen ari dira. Prozesu horren emaitzak eta landutako gogoetak partekatzeko, jardunaldi berezia antolatu dute azaroaren 20rako, Azpeitiko Dinamoan.

Jardunaldia kultur eragile, teknikari, zinegotzi, erabiltzaile, sortzaile eta kulturzaleei zuzenduta dago. Egitarau osoa eta izen-ematea urriaren 1etik aurrera egongo dira eskuragarri Oinherriren webgunean.