Ikasturte hasiera honetan guraso eta hezitzaileen bidelagun diren elkarteen atea jotzen dugu beraien asmo eta erronka berriak ezagutzeko.

Bizipoza elkartearen atzean ehunka familia eta pertsona aurkituko ditugun arren, guk Leire Elizegirekin hitz egin dugu. Bizipoza elkarteko koordinatzailea da Leire, eta, elkartea zer den eta zein helburu dituen azaltzeaz gain, ikasturte berrirako dituzten erronkak eta ilusioak ere azaldu dizkigu.

Bizipoza irabazi asmorik gabeko gizartegintza egitasmoa da: izaera bereziko gaiak lantzen dituzten haur eta familien ongizatea helburu duten elkarteei laguntza afektiboa eta materiala eskaintzea du xede. Elkarte, haur eta familia hauek transmititzen dituzten baloreak jasoaz aberastu, hezi eta gizarteratzea.

Bizipozak bizipoza du misio: hainbat zailtasun bizi dituzten familiekin eta elkarteekin batera poza partekatzea, euskaraz eta sorkuntzatik. Elkarte guzti hauek transmititzen dituzten baloreak gizarteratzea da poztasunaren misioa.

Bizipozak auzolana du bisio: denetariko herritar, talde eta erakundeek osaturiko boluntario sarea osatzea gizartegintzaren poza bizitzeko.