Euskadiko Orkestrak abiatu du musika sinfonikoa haurrei, gazteei eta hainbat kolektibori hurbiltzeko programazio berezia. Musika Gela ziklo berriak bost ekoizpen propio ditu: aurreko denboraldietan aurkeztutakoak batzuk —’Arriaga bizi da’, ‘Logelan Logale’ eta ‘Mozart, Nannerl eta Lagunak’—, eta orain estreinatuko diren beste bi —’Aniztasuna harmonian’ eta ‘Brassstorm’—.

Bost produkzio hauek bi formatutan aurkezten dira, Eskola Kontzertuetan eta Musika Familian kontzertuetan eta zikloak 70 jarduera baino gehiago izango ditu. Lehenengo bi saioak Urriaren 15ean eta 22an izan dira.

Tartean, nabarmentzekoa da Logelan logale haur kantatak haur gorrentzako funtzio irisgarria eskainiko duela, eta 16 gaztek zeinu-hizkuntzaren bidez abestuko dutela, abesbatza pilotuarekin batera.

Denboraldia osatzeko, Musikazaleak programaren hirugarren edizioa egingo da, FEVAS-Plena Inclusion Euskadirekin batera, adimen- edo garapen-desgaitasuna duten pertsonen praktika musikala eta parte-hartze kulturala sustatzeko, bai eta dagoeneko ohikoak diren Entsegu Irekiak ere, orkestraren eguneroko lana ikastetxeetara eta gizarte-kolektiboetara hurbiltzen dutenak.

Denboraldi honetan kolektiboei, ikastetxeei, kontserbatorioei eta unibertsitateei eskainitako hiru entsegu ireki eskainiko ditu Euskadiko Orkestrak. Abenduaren 3an, otsailaren 1ean eta apirilaren 22an izango da.

7.000 ikasle Eskola Kontzertuetan

Haur Hezkuntza, Lehen Hezkuntza eta Bigarren Hezkuntzako 7.000 ikasle inguruk parte hartuko dute aurtengo Eskola Kontzertuetan.

Bestalde, ekoizpenak Musika Familian kontzertu formatuan eskainiko dira Donostian eta Gasteizen. Euskadiko Orkestrak haur eta gazteei eskaintzen dizkien jardueren artean. Haurrek familiekin gozatzeko kultur aisialdiko eskaintza honek 30 urte daramatza orkestraren egitarauan. Ikuskizun guztietarako sarrerek 3 eta 8 euro bitarteko prezioa dute eta euskadikoorkestra.eus webgunearen bidez eros ahal izango dira, ikuskizunen datak hurreratu ahala. Dagokion aretoaren leihatiletan ere egongo dira salgai eta Kursaalen webgunean (kursaal.eus).

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Nire ama antzara; Musika tantak; Ilargiari kantari; Boléro; Polikinela; eta Living Room Music. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.

Egutegia eta informazio gehiago: Euskadiko Orkestra Sinfonikoa.