Haurtxo bat negar-zotinka hasten da goizaldean. Lasaitzera joan gara eta begiak zabalik begiratzen digu, baina gu ikusi gabe. Ezagutzen ez bagaitu bezala da. Eta ez dago lasaitzeko modurik. Ukitzean zurrun jartzen da eta negar gehiago egiten du. Larritasun handia sentitzen dugu. Azkenean, bera bakarrik lasaitzen da, eta lo geratzen da.

Gaueko beldurrak izan daitezke. Ez dira amesgaiztoak. Beste izaera bat dute eta beste jokabide bat eskatzen dute. Ea argitzen dugun kontua…

Fenomeno oso desberdinak

Gaueko beldurrak zein amesgaiztoak loaren fase ezberdinetan gertatzen diren loaren bi alterazio arrunt dira, parasomniak. Haurraren hasierako erreakzioa antzekoa bada ere –negarra, beldurra…–, alterazio bakoitzaren aurrean jarduteko moduak desberdina izan behar du.

Gaueko beldurrak haurraren loaren asaldura bat dira. Urtebeteko eta sei urtera arteko tartean gertatzen dira gehienbat, eta gezurra badirudi ere ez dute inolako ondoriorik haurraren eguneroko bizitzan. Ez zaie ume guztiei gertatzen, eta zer diren jakiteak gurasoak lasaitzen laguntzen du.

Gaueko beldurrak

Gaueko beldurrak gauaren lehen herenean gertatzen dira, loaren faserik sakonenean, NREM fasean. Gurasoentzat larrigarriak badira ere, haurra ez da gertatzen zaionaz jabetzen.

Somnanbulismo moduko bat dira, eta 5-15 minutu iraun dezakete.
Ez dute ez ondoriorik ez kausa fisiko ez psikologikorik. Hurrengo egunean, umeak normal esnatzen da, eta ez du pasadizoaz ezer gogoratzen.

Hasiera batean, ez da ezer egin behar. Ez da komeni ez haurra besoetan hartzea, ez bularra ematea, ez esnatzea. Gomendioa da pasa arte itxarotea. Gaueko beldurrean dagoen bitartean haurra benetako lo sakonean dago eta ez da gurasoen presentziaz ohartzen. Kontuz, beraz. Ez jarri urduriago umea lasaitzeko saiakeran; izan ere, normalean, haurra pixkanaka lasaitzen da. Baliteke bere negarra eraginez esnatzea. Orduan, lasaitu egin behar da.

Gaueko beldurrak errepikatu daitezke denbora zati batean, baina ohikoena pixkanaka desagertzen joatea da. Gero eta gogorragoak badira, komeni da pediatrarekin kontsultatzea, eta, beharrezkoa ikusten bada, loaldian aditua den pediatra batengana bideratzea.

Amesgaiztoak

Amesgaiztoak oso bestelako fenomenoa dira. Gaueko beldurrak ez bezala gaueko azken herenean agertzen dira, lo arineko fasean edo REM fasean.

Haurra erdi esna dagoenez, oroitzapen txar bat utz diezaiokete amesgaiztoak eta litekeena da ohikoa baino urduriago edo mainosoago esnatzea.

Lehen egiteko, kasu honetan, haurra lasaitzea da. Haur batek amesgaizto asko dituenean, komeni da une zailen bat bizitzen ari den aztertzea. Galdetu haurtzaindegian, erreparatu telebista ikusten zenbat denbora ematen duen eta zer ikusten duen…

Oro har, amesgaiztoak ere bakarrik desagertzen dira pixkanaka. Ez bada horrela, eta ez badago haurra kezkatuko duen ezer, komeni da pediatrarekin kontsultatzea.

Argazkia: Freepik.