AktualitateaDestakatuaElkarrizketaHezkuntza

Ane Ablanedo: “Irakasleok irakasle izateari utzi, eta bidelagun izaten ikasi beharko genuke”

2020-07-05 Iruzkin 1

Hik Hasi Laborategiaren itxiera moduan Irailerako gakoak: hausnarketa kolektiboa delako hitzaldia egin zuten Amaiurko herri eskolako maistra eta zuzendari Nora Salbotsek eta pedagogia berritzaileetan aditua Ane Ablanedok. Azken horrek aipatu zituen ikasturte berrirako kontuan hartu beharreko pautak eta markoa.

Zeintzuk dira irailerako kontuan hartu beharko genituzkeen kakoak?

Zintzoki uste dut, krisi honen aurrean, pisu akademikoa kendu beharko geniokeela oraingo eskolari. Lan karga kendu, eta umeek ikasi dezatela bizi dutenarekin, izan eskolan, izan etxean. Konfinamenduan egon garenean irakasleok etengabe ibili gara lanak bidaltzen, ikas-materia banatzen, ikasleekin hartu-emanak egiten… Ez diegu askatasunik eman konfinamendua beraien kasara bizi izateko. Hori oso agerian geratu dela esango nuke.

Uste dut oso garrantzitsua dela pertsona erdigunean ipiniko duen jarduna egitea, baita eskolan ere. Bizitzari tokia eman behar diogu.

“Normaltasun berrian” gauden honetan, irailetik aurrera, eskolak modu berezian,eman eta jaso beharko dira?

Bai. Pandemia batean sartuta gaude, eta horrek guztiak baldintzatu du, eta oraindik ere baldintzatuko du. Eskola presentzialak eta telematikoak partekatuko beharko dira. Horrelako formatuak aurreikusi beharko genituzke. Eskolak eman behar baditugu, modu berezian izango da.

Bada, eskolan bizitzari lekua utzi behar badiogu eta pertsona erdigunean ipini behar badugu, akaso egungo eskola formatua ez da egokiena. Akaso, ez ditugu horrenbeste eskola eman behar. Bizitzarako behar ditugun gauzak eta eskolak eskaintzen dizkigunen artean dagoen arrakala oso handia da. Eskola libreagoa izan dadin borrokatu beharko genuke. Ikasleak etxera eraman ditzala bere lanak, baina bere modura antolatzeko eta ikasteko. Irakasleok irakasle izateari utzi eta bidelagun izaten hasi beharko ginateke.

Hausnarketa kolektiboa egiteko baliatu duzue Hik Hasi Laborategiaren hitzaldia. Zeintzuk izan dira ondorio nagusienak?

Eskolan egokitzen jakin behar du. Eskola on batek prest egon beharko edozein egoerara moldatzeko. Pertsona da ikasten duena, munduarekin erlazioa duena eta, modu batera edo bestera, sentitzen duena. Hori guztia kontuan hartzen duen eskola askoz errazago egokitzen da bizi izan dugun pandemia baten aurrean. Aldiz, egokituko ez dena da orain arte bidetik jarraitu gura duen eskola. Curriculumean tematuta dagoena. Konfinamenduko hilabeteak galera bat izan direla uste dutenak. Haurrak etxean egon dira bizi izaten, gauza piloa ikasten. Eskolan egon izango balira moduan.

Hortaz, sinistuta nago egungo eskola sistemak ez duela balio bizitzan aurrera egiteko. Ikusarazi behar dugu sistema errotik aldatu behar dugula. Kontziente naiz ez dela goizetik gauera egiten den zerbait, baina, aldaketa abiatzeko prest egon beharko genuke.



Iruzkin 1 "Ane Ablanedo: “Irakasleok irakasle izateari utzi, eta bidelagun izaten ikasi beharko genuke”"

  1. Avatar
    Ainhoa
    2020-07-06 Erantzun

    Guztiz ados, eskola berriztatu behar dugu eta ausartak izan behar bidea ez da erraza baina gure seme alabek merezi duten.


Zure iritzia partekatu nahi duzu?

Zure eposta ez da argitaratuko. Derrigorrezko eremuak * bidez markatuta daude.

Utzi erantzuna