Musika hezkuntza goiztiarreko saioen eskaintza ugaritzen doa azken urteotan. Horietan, txiki-txikitatik umeek musikarekin disfrutatzeko aukera ematen dute eta gainera, gurasoen edo erreferentziazko helduen babespean egiten dituzte saioak, elkarren arteko konekxioa ere hobetzen laguntzeko.

Musika hezkuntza goiztiarraren onurak askotarikoak direla azpimarratzen dute profesionalek, eta hauek nabarmentzen dituzte:

  • Musika maitatzeko gogoa piztea.
  • Ume eta gurasoen arteko harremanak indartzea; musikaren bidez.
  • Gaitasun kognitiboak, psikomotorrak, afektiboak, sozializazioa eta komunikazioa garatzea; indibidualtasuna eta berezkotasuna galdu gabe, musikaren bidez haurraren garapen integrala lortzeko.
  • Gaitasun musikalak garatzea; hala nola gaitasun erritmiko-psikomotorrak, ahotsaren, entzumenaren eta musika-tresnen bidez.
  • Gurasoei hainbat baliabide ezagutaraztea; hala nola haur-kantak, poesiak, ipuin musikalak, dantzak, jolasak eta psikomotrizitate-ariketak.

Tailer horietan lantzen diren eduki musikalak, erritmo, ahots entzumen eta instrumentu hezkuntza dira. Hori guztia, abestietan erritmoak kolpatuz, dantzatuz, kanta ezberdinak abestuz –hizkuntza bereganatzeko, memoria lantzeko, sozializazioa sustatzeko…–, inguruko soinuak ezagutuz eta bereiztuz, entzunaldiak eginez, perkusio txikiko musika-tresnak esploratuz eta joz… egiten dute. Beste eduki mota batzuk ere lantzen dituzte, hala nola, gorputz eskemaren ezagutza, espazio eta denbora egituraketa, hiztegia eta psikomotrizitatea –tentsioa-erlaxazioa, oinarrizko mugimenduak, lateralitatea, oreka…–.

Oñatin, esaterako, Jose de Azpiazu musika eskolan eskaintzen dituzte 2 eta 3 urteko haurrendako eta horien gurasoendako horrelako saioak, astean behin.

Arantzazu Bikuña irakaslea da saio horien gidaria, eta musika hezkuntza goiztiarraren onurak azpimarratu ditu: “Ikertzaile askok sakonki aztertu dute musika hezkuntzak umearen garapen integrala lortzen laguntzen duela, eta horretan lan egiten dugu guk ere. Umea guraso edo gertuko batekin etortzen da saioetara, eta giro polita sortzen da”.