Urriaren 30ean ostiral honetan egingo dute 2026ko Arimen Biltzarra herriko eragile ezberdinek antolatuta.

Arrasatek prest du Gaba Baltza ospatzeko egitaraua. Euskal ohiturak eta herri-kultura ardatz hartuta, hainbat jarduera antolatu dituzte urriaren azken egunetarako; horien artean, Arimen Biltzarra izango da hitzordu nagusietako bat. Urriaren 30ean, ostiralean, egingo dute, herritarrak arimaz, musikaz eta giro bereziz betetako kalejiran elkartzeko.

Arimen Biltzarra 18:30ean hasiko da, Biterin. Handik, kalejira abiatuko da Monterron parkera, eta bertan hainbat emanaldi eta sorpresa izango dituzte zain parte-hartzaileek. Herriko hainbat kultur taldek hartuko dute parte: Doke antzerki eskolak, Arrasateko txistulariek, Goikobaluko Izartxo taldeak, Arrasateko trikitixa eskolek, Txikitxu Arrostaitz dantza taldeak eta Ttakun txalaparta taldeak.

Antolatzaileek herritarrak kukumarroz edo baserritarrez jantzita joatera gonbidatu dituzte, jaiaren berezko giroa sortu eta euskal tradizioak kalean bizitzeko. Baina nola jantziko gara kukumarroz? hona hemen Txatxilipurdi elkarteko kideek egindako azalpen bideoa.

Gaba Baltza, egun bakarretik harago

Gaba baltza ez da egun bateko ospakizun hutsa. Egunaren bueltan, Arrasateko hainbat eragilek jarduerak prestatu dituzte, belaunaldi desberdinen parte-hartzea sustatzeko eta euskal ohiturak ezagutarazteko.

Udal ludotekek, esaterako, udazkeneko gaiekin lotutako proposamenak eskaini dituzte: feltrozko irudiak sortzea, kandelak egitea, ipuin-kontalari saioak eta udazkeneko produktuekin sukaldatzea. Ekin Emakumeak elkarteak ere «Sortu zure kukumarroa» tailerra antolatu du, 15 urtetik gorakoentzat.

Gaztetxokoak, bestalde, Beldur Etxea prestatuko du urriaren 31rako eta azaroaren 1erako, 12 urtetik gorako gazteei zuzenduta. Jarduera horren bidez, beldurra eta misterioaren inguruko esperientzia eskaintzea dute helburu.

Euskal ohiturak berreskuratzeko aukera

Gaba Baltza edo Arimen Gaua hildakoen oroitzapenarekin, iluntasunarekin eta udazkenetik negurako igarobidearekin lotutako tradizioen barruan kokatzen da. Kalabazak eta arbiak hustu eta barruan kandelak pizteko ohiturak, besteak beste, ospakizun horren iruditeria osatzen du.

Horrenbestez, Arimen Biltzarrak jai-giroa eta herriko kultur taldeen lana uztartzen ditu, euskal ohiturak belaunaldi berriei transmititzeko. Antolatzaileen gonbidapena argia da: mozorroa jantzi, kalera atera eta Gaba Baltza elkarrekin ospatzea.

Txatxilipurdim elkartea da egitasmoaren bultzatzaileetako bat, ekimenaren bere ikuspegia zein den azaltzeko azalpen bideoa argitaratu zuen pasa den astean.