Barrea, irudimena eta errealitateari beste ikuspegi batetik begiratzeko aukera: haur eta gazte literaturan umoreak duen lekua aztertu dute Galtzagorriko kideek eta gonbidatuek Naiz Irratian egindako solasaldian.

Zer-nolako lekua du umoreak haur eta gazte literaturan? Nola lortzen dute idazleek irakurleen barre algarak piztea? Eta zer funtzio betetzen du umoreak haurren eta gazteen garapenean? Galdera horien inguruan aritu dira Arrosa sarean hilero egiten duten kolaborazioan.

Malen Frantsesenearen gidaritzapean, Zebrabidea saioan, Juan Kruz Igerabide idazle eta Galtzagorri Elkarteko lehendakaria, Asun Agiriano Arrasateko Udal Bibliotekako zuzendaria eta Izaskun Jauregi Galtzagorriko idazkaria bildu dira, haur eta gazte literaturako umorearen inguruan hausnartzeko.

Barre eginaraztetik harago

Aurtengo Ikusi Mikusi Festibalaren PRO Egunean, Asun Agirianok eta Juan Kruz Igerabidek umoreari buruzko saio bana eskaini zuten. Irratiko solasaldian, gai horri heldu diote berriro, hainbat ikuspegitatik: haur eta gazteen barre algarak pizten dituzten istorioak, irakurleengan irribarrea sortzeko baliabide literarioak, umore mota desberdinak eta haur eta gazte literaturan umoreak duen lekua, besteak beste.

Umorea, ordea, ez da barre eginarazteko tresna hutsa. Errealitateari distantzia hartzen, egoera zailak beste modu batera ikusten eta bizipenak arintzen lagun diezaguke. Horregatik, haur eta gazte literaturan ere funtzio garrantzitsua betetzen du: irakurleei gozatzeko aukera emateaz gain, mundua ulertzeko eta hari aurre egiteko beste modu batzuk eskaintzen dizkie.

Juan Kruz Igerabideren hitzetan, umorea, azken finean, «tristura irribarretsua» da, bizitzen jarraitzen laguntzen digun sentimendua.

Entzun solasaldia osorik

Haur eta gazte literaturako umoreaz gehiago jakin nahi baduzu, solasaldi osoa entzuteko aukera duzu hemen.