COVID 19 testuinguruak, jendarte gisan dauzkagun errutina, arau zein kodigoak errotik eraldatu dizkigu. Ondorioz, egokitzapen prozesu kolektibo batean barne bildurik gaudela esan genezake, non momentuz nahikoa lan dugun errealitate berria onartu eta honi, neurria hartzen.

Ez ohiko egoera honetan, natur guneek balio erantsi berezia eskuratu dute, gure askatasun zein aisialdiaren babesgune nagusi bilakatuz. Horren adierazle argiak dira, azken aste-bukaeratan mendi inguruetan batu izan diren jende multzoak (herrietako tontorretan, Arantzazun, Araotzen, Urkiolan …), inoiz ikusi gabeko irudiak.

Hau horrela izanik, Arrasaten, LEK, Besaide Mendi Elkartea, Gaztetxeko Guraso eta Haur Asanblada eta Txatxilipurdi Elkartetik, eremu hauekiko dugun hartu emana berreskuratzen jarraitzeko mezua zabaldu nahi dute, beti ere, espazioa hauen balio, begirune zein zaintzari garrantzia emanaz.

Egoera hau izanik, aurten ere ekimenari eusteko premia berezia sumatu dute eta ondorioz, badira jada aste batzuk 6. edizioaren prestaketa lanetan murgildurik dabiltzala. Aurtengo proposamenaren nondik norakoak ezagutzeko Iñaki Telleria Txatxilipuri elkarteko kidearekin hitz egin dugu:

Iñaki Telleria

Iñakik aipatutako moduan, aurtengo edizioan natura, jolasa, sormena eta artea uztartuko dituzte. Horretarako, maiatzaren 14an, erronka bat zabaldukozuten herrira non, honen bitartez, “ZER DA ZURETZAKO NATURAN JOLASTEA?” galderari erantzuten saiatuko beharko garen sormena, artea eta material anitzak baliatuz. Hona hemen ekimenaren sustatzaileek egindako ideia ezberdinen bideoa:

Maiatzaren 29an Naturan Jolasean eguna burutuko dute eta Arrasatearrak familian, lagunartean edo eta bakarka beraien arte lanak, SantaBarbara Azpiko natur eremura (Arimazubi gunearen parean) ekartzera animatu dituzte, bertan jarriko duten zuhaitz zintzilikarian lanak eskegi eta erakusketa kolektibo bat osatzeko. Lan honetarako, POOK artista elkarteko kideen bide-laguntza ere izango dute.  Horrez gain, parte hartzea sustatzeko, animatzen diren herritarren arten, hiru Berdean Hezi OTAR zozketatuko dituzte Olgetan jostailu dendak luzatuta.

Egunean bertan bestelako ekintza batzuk ere burutuko dituzte eremu beraren bueltan. Hala nola, goizean zehar Udalako Ingurumen Eskolako zein Guraso.eus proiektuko lagunekin batera, ibilbide gidatua egingo da inguruko flora ezagutzeko asmoz. Bestetik, arratsaldean “mural-collage” erraldoi bat osatuko dute auzolanean eta egunarekin amaitzeko, ekitalditxoa izango da hitzartze, zozketa zein talde argazkiarekin.

Jarraian, egitarau zehatza:

  • 11:00 – Erakusketa kolektiboa martxan jarriko dugu.
  • 11:30 – KaleNATURA ibilbide gidatua (Maiatzak 1 plazatik abiatuta).
  • 16:00 – “Mural-collage” erraldoia estilo libre-espontaneoan.
  • 18:00 – Naturan Jolasean ekitaldia.

Oharrak :

  • Eguzki zein euri, ekimenak aurrera egingo du eta toki berean mantenduko da, SantaBarbara Azpin.
  • Deialdia adin tarte guztietara dago zabalik.
  • Indarrean dauden babes neurriak direla eta, derrigorrezkoa izango da musukoa erabiltzea, talde txikitan aritzea eta azkenik, asistentzia neurtze aldera, jarraian luzatzen dizuegun galdetegia betetzea: https://labur.eus/naturanjolasean_izenematea