Bainurako zein egun pasa egiteko Artziniegako presa dakargu gaurkoan txoko honetara. Artziniega Arabako udalerria da, Aiaraldea kuadrillan dagoena. Gasteiztik 55bat kilometrora dago, eta 1.900 biztanle inguru ditu.

Erdi Aroko hiribildu ederra da. Artziniega ibaiaren eskuineko ertzean dago eta oraindik ere ikusgarriak diren eraikinak mantentzen ditu.

Inguru menditsu eder batean kokatzen da Artziniega eta herrigunetik 500 bat metrora aurkitzen da bainurako prestatuta dagoen presa.

Erraz topatuko duzue bidea. Plazatik abiatzen da aldapan behera eta seinaleztatuta dago. Paseo lasaia eta laua da behin hasierako aldapa jaitsita. Eserlekuak eta zaborrontziak badaude.

Laster entzuten da urjauziaren doinua. Presaren azpian dago eginda bainurako lekua. Ez da oso handia eta harrizko hondartza ere badago gauzak uzteko.

Esan gabe doa; ura fresko-freskoa da, baina Artziniega inguruan bero egiten du udan eta eskertzen da. Presaren kontran iturria ere badago eta ibaia zeharkatzeko harri ilara dago jarrita pasabide moduan presaren goiko aldean.

Leku beretik abiatzen da Utxati (511 m.) tontorrerako ibilbidea. Familian egiteko txanda oso aproposa da.

Frontoia eta bolatokia erdigunean

Herrira itzulita interesgarria da jakitea frontoi eta bolatoki ederrak dituela Artziniegak. Espazio biak daude erabilgarri. Frontoia, gainera, estalia da.