Beste herri batzuetan egin izan duten bezala, Azkoitiko haurrak herriko eskoletara oinez joateko Eskolara Oinez izeneko egitasmoa abiatu dute, Floreaga ikastetxeak, Xabier Munibe ikastolak eta Azkoitiko Udalak elkarlanean.

Haur Hezkuntzako eta Lehen Hezkuntzako haurrei zuzenduta dagoen egitasmoaren helburua, alde batetik, “mugikortasuna hobetzea” da, eta bestetik, familiendako leku “osasungarriagoa”, “seguruagoa” eta “atseginagoa izatea” da.

Gurasoen laguntza bidean

Ekimena aurrera eraman ahal izateko sei irteera puntu zehaztu dituzte, honakoak: Altzibarko Anaitasuna plaza, Txalonerreka, Floreaga auzoko parkea, Santa Klara kalea, Altamira auzoa eta Trenbidearen Zumardia kalea. Sei puntu horietatik irtenda, eta lau ibilbide ezberdin eginda iritsiko dira haurrak euren eskoletara.

Bestalde, haurren segurtasuna bermatzeko, txaleko identifikatzaileak soinean eramango dituzten guraso boluntarioak egongo dira; eurekin egingo dute eskoletarainoko bidea.  “Egitasmoak funtziona dezan, ikastetxe bakoitzean familia boluntarioen talde txiki bat osatu beharko da, txandak antolatzeaz, gorabeherak kudeatzeaz edo hobekuntzak proposatzeaz arduratuko dena”, adierazi du Azkoitiko Udalak.