Badiako ikastola txiki kementsu haiek dokumentala aurkeztu dute Pasai Donibanen. Badihardugu euskara elkarteak Pasaiako eta Lezoko udalen enkarguz prestatu duen ikus-entzunezkoa da. Pasaiako badiako bost ikastola txikien historia kontatzen du eta nola elkartu ziren Pasaia-Lezo lizeoa sortzeko. 

Ikastoletako irakasle, guraso, laguntzaile eta ikasle ohiak izan ziren aurkezpenean eta hunkituta ikusi zuten ikus-entzunezkoa, garai zaharrak gogoratuz. Dokumentalak bost ikastola txikiren historia kontatzen du –Lezo, Trintxerpe, Pasai Donibane, Pasai San Pedro eta Pasai Antxo– eta baita ere nola elkartu ziren, Pasaia-Lezo Lizeoa sortzeko.

Ordubete pasatxo irauten du. Badiharduguko Idoia Etxeberriak egin ditu elkarrizketak eta gidoia. Edizioaz, berriz, Haizea Odria arduratu da. Elkarrizketatutako guztien testigantzak Ahotsak.eus webgunean daude, ehundik gora bideo-pasarte ikus daitezke Badiako ikastola txikiak proiektuan. 37 pertsona elkarrizketatu zituzten eta ia bi urteko lan-prozesua izan da. 

Dokumentala laster egongo da ikusgai YouTubeko hiru kanaletan: Ahotsak, Pasaiako Udala eta Lezoko Udala.