Eusko Jaurlaritzak seme-alabak dituzten familientzako hileko dirulaguntzak luzatu eta handitu ditu. Uztailaren 1ean indarrean sartu zen dekretu berriaren arabera, haur bakoitzeko oinarrizko laguntza jasotzeko adin-muga 3 urtetik 4 urtera luzatu dute. Neurriaren indarraldiko lehen hiru hilabeteetan, 20.548 eskaera jaso ditu Ongizate, Gazteria eta Erronka Demografiko Sailak.

Laguntzak seme-alabak dituzten familiei zuzenduta daude, haurrak jaiotzen direnetik edo familiara iristen direnetik hazkuntzaren lehen urteetan dituzten gastuei aurre egiten laguntzeko. Horiek jasotzeko, familiek EAEn bizi eta erroldatuta egon behar dute, haurraren bizileku berean, gutxienez urtebeteko antzinatasunarekin; bestela, aurreko hamar urteetan bost urteko erroldatzea egiaztatu beharko dute. Horrez gain, adingabearekin bizi, eta haren zaintza gauzatu behar dute laguntzaren xede den aldian.

Hilean 200 eurora arte

Laguntzaren zenbatekoa hilean 200 eurokoa da 0 eta 4 urte bitarteko seme-alaba bakoitzeko. Bestalde, 4 eta 7 urte bitarteko seme-alabak dituzten familia ugariek eta guraso bakarreko familiek hilean 100 euroko laguntza jaso dezakete. Seme-alabak % 33ko edo gehiagoko desgaitasuna edo mendetasuna aitortuta badu, laguntzaren zenbatekoa bikoiztu egiten da.

Gainera, erditze anizkoitzen, adopzio nazional anizkoitzen, tutoretza edo zaintza-eskuordetza anizkoitzen eta nazioarteko adopzioen kasuan, ordainketa bakarreko aparteko laguntzak ere aurreikusten dira.

Laguntzak zabaltzeak 33,3 milioi euroko inbertsio gehigarria ekarriko du. Dekretuak atzeraeraginezko ondorioak ditu 2026ko urtarrilaren 1etik aurrera, eta, beraz, baldintzak betetzen dituzten familiek data horretatik aurrerako laguntza jasotzeko aukera dute.

20.548 eskaera hiru hilabetean

Jaurlaritzak emandako datuen arabera, uztailaren 1etik aurrera jasotako 20.548 eskaeretatik 15.568 baliozkotu dituzte dagoeneko, eta beste 4.980 kudeaketa-aplikazioan sartzeko zain daude.

Baliozkotutako eskaeren artean, 10.226 laguntza lau urtera arte luzatzeari dagozkio. Horietatik 5.612 2022an jaiotako haurrei buruzkoak dira, eta 4.352, berriz, 2023an jaiotakoei dagozkie. Dekretuak, era berean, 4 eta 7 urte bitarteko seme-alabak dituzten familia ugarien, guraso bakarreko familien eta desgaitasunen bat duten haurren familien laguntzak jasotzen ditu. Sailak 591 eskaera jaso ditu familia ugarien aldetik, 414 guraso bakarreko familiengandik eta 83 desgaitasunen bat duten seme-alabak dituzten familiengandik.

Eskaerak aurkezteko aukera zabalik dago Eusko jaurlaritzaren webgunean. Informazio gehiago jasotzeko edo zalantzak argitzeko, umeak@euskadi.eus helbide elektronikora idatzi daiteke, edo 945 01 80 00 telefonora deitu.