Kapsula Kuantikoa Donostian abiatu da, eta datozen bederatzi hilabeteetan EAEko 147 udalerri bisitatuko ditu. Unitate mugikorraren helburua fisika eta teknologia kuantikoak herritarrengana gerturatzea da, gai horiek eguneroko bizitzarekin duten lotura eta etorkizunean izan ditzaketen aplikazioak modu ulergarrian azaltzeko. Horretarako, ikus-entzunezko baliabideak eta instalazio interaktiboak erabiliko ditu.

Kapsula barruan, bisitariek fisika kuantikoaren oinarrizko printzipioetako batzuk ezagutuko dituzte, baita arlo horren garapenean izan diren mugarriak eta dagoeneko egunerokoan erabiltzen diren aplikazioak ere. Besteak beste, laserretan eta kokapen-sistemetan kuantikak duen presentzia azalduko da, baita konputazio kuantikoak ikerketan, osasunean, energian, materialetan eta komunikazioetan izan ditzakeen erabilerak ere.

Publiko guztiarentzako egokitutako edukia

Ekimenak publiko guztiearentzat egokitutako edukiak izango ditu. Alde batetik, taldeentzako bisitak antolatuko dira, aurrez erreserba eginda; bereziki ikastetxeei, aisialdi elkarteei eta behar espezifikoak dituzten kolektiboekin lan egiten duten eragileei zuzenduko zaizkie. Bestetik, sarbide libreko saioak ere egingo dira, edonork kuantikaren inguruko oinarrizko ezagutzak modu parte-hartzailean jasotzeko.

Ibilbidea Donostian hasi du, eta lehen geldialdien artean Errenteria izango du. Ondoren, Gipuzkoako 50 udalerri baino gehiagotara iritsiko da, eta gabonetan Bilbora helduko da. Urtarriletik aurrera Bizkaian barrena ibiliko da, eta azken hilabeteetan Araban izango da. Ibilbide osoa 2027ko uztailean amaituko du Iruña Okan.

Hona hemen urrian bisitatuko dituen herrien zerrenda:

  • Urriak 4-6-7. Donostia. Jose Migel Barandiaran (Sagues).
  • Urriak 8-9-10. Errenteria. Agirre Lehendakariaren plaza.
  • Urriaren 13an. Lezo. Euskal Herria Plaza.
  • Urriaren 14a. Oiartzun. Done Eztebe plaza, 1. Elizalde.
  • Urriaren 15a. Astigarraga. Barandiaran plaza, Kale Nagusia, 23.
  • Urriaren 16tik 17ra. Pasai San Pedro. Lonja plaza, Portualdea Kalea, 6.
  • Urriaren 20a. Urnieta.  (Tokia baieztatu gabe).
  • Urriaren 21a. Andoain. Goiko Plaza  (Tokia baieztatu gabe).
  • Urriaren 22a. Usurbil. Gernika Ibilbidea.
  • Urriaren 23an eta 24an. Hondarribi.  (Tokia baieztatu gabe).
  • Urriaren 27a. Orio. Abaromendi kalea 2 (Hondartza bidea)
  • Urriaren 28A.  Aia (Tokia baieztatu gabe).
  • Urriaren 29a eta 30a. Irun. Zabalgune plaza.
  • Urriaren 31. Ormaiztegi  (Tokia baieztatu gabe).

Kapsula Kuantikoa noiz eta non egongo den jakiteko, Zientzia Klik zientzia-kulturaren agendan kontsulta daiteke egutegia eta udalerri bakoitzeko informazioa. Ibilbidearen berri Instagram bidez ere emango dute, #KapsulaKuantikoa traolaren bidez.