Bullyinga haurren eta nerabeen egunerokoan eragin handia izan dezakeen errealitatea da, eta haren aurrean ezinbestekoa da ikastetxeen, familien eta hezkuntza ez-formaleko eragileen arteko elkarlana. Horri begira sortu da Bullyingari Galga!, bullyinga prebenitzen eta gaiaren inguruan hausnartzen laguntzeko euskarazko ikus-entzunezko baliabideen egitasmoa.

Fagor Herrigintza lankidetza programaren laguntzarekin, ikus-entzunezkoen alorrean diharduen Ihitten elkarteak hainbat urtez garatu du proiektua, eta dagoeneko prest dago gizarteratzeko. Egitasmoaren aurkezpen ofiziala urriaren 20an, 18:00etan, Arrasateko Kulturaten egingo da. Sarrera librea izango da, eta ez da aldez aurretik izena eman beharrik izango.

Aurkezpena, gainera, ez da ohiko aurkezpen formatuan egingo. Bullyingaren inguruko mahai-inguru baten bidez aurkeztuko da proiektua, eta bertan parte hartuko dute Maitane Ormazabal Esnaola psikologoak eta Irati Galardi Lizarragak, bullyinga zuzenean bizi izan duen pertsonak. Haien esperientzia eta ezagutzatik abiatuta, bullyinga ikusaraztea, haren inguruan hausnartzea eta egoera horiei aurre egiteko bideak bilatzea izango dira solasaldiaren ardatzak.

Prebentzioa eta enpatia erdigunean

Bullyingaren aurrean protokoloak eta esku hartzeko neurriak gero eta gehiago ezagutzen badira ere, adituek garrantzi berezia ematen diote prebentzioari eta enpatiari. Alegia, bullying egoerak gertatu aurretik kontzientzia lantzeari eta beste pertsonaren lekuan jartzeko gaitasunari.

Horixe da, hain zuzen, Bullyingari Galga! egitasmoaren helburuetako bat. Ikastetxeetan zein hezkuntza ez-formaleko espazioetan —aisialdiko eta kiroleko taldeetan, esaterako— bullyingaren inguruan hitz egiteko eta hausnartzeko tresnak eskaintzea du xede.

Horretarako, Ihittenek euskarazko ikus-entzunezko edukiak bildu ditu webgune batean. Bertan, besteak beste, adituen azalpenak, bullyinga bizi izan duten protagonisten testigantzak eta egoera desberdinak antzezten dituzten bideoak aurki daitezke. Azken horien bidez, gainera, bullying egoera batean norberak izan ditzakeen rolak identifikatu eta horien inguruan hausnartzeko aukera eskaintzen da.

Gurasoentzako ere bai

Egitasmoa ikastetxe eta hezkuntza ez-formaleko eragileei zuzenduta badago ere, familiek ere badute zeresan handia bullyingaren prebentzioan. Etxean gaiari buruz hitz egiteak, haurren eta nerabeen emozioei arreta jartzeak eta besteekiko errespetua eta enpatia lantzeak lagundu dezake bullyingaren aurkako jarrera eta kultura sendotzen.

Horregatik, urriaren 20ko aurkezpenera gurasoak, tutoreak, hezitzaileak eta gaiarekin interesa duen oro gonbidatuta daude. Mahai-ingurua bullyingaren inguruan informatzeko ez ezik, gaiari buruz hitz egiteko, hausnartzeko eta egunerokoan erabilgarriak izan daitezkeen baliabideak ezagutzeko aukera izango da.

Hitzordua: urriaren 20a, 18:00etan
Lekua: Arrasateko Kulturate
Sarrera: doan, aurrez izena eman beharrik gabe