ERA, aurreko urteotan hasitako bideari jarraiki, Jolasak eta Solasak bilduma hornitzen ari da. Oraingoan beste sei bideo erantsi dizkiote bildumari, guztiak ere arinak, errazak eta, jakina, seme-alabekin aise erabiltzeko modukoak.

Jolasak eta Solasak bildumaren helburua baliabide praktikoak eskaintzea da, gurasoek eta seme-alabek egunerokoan izaten dituzten harremanetarako eta egunerokoan sortzen diren egoera ezberdinetarako: jolasteko, zotz egiteko, denbora pasatzeko, lokartzeko…

Hamaika dira egunero sortzen zaizkigun egoerak, eta horietarako egokiak diren jolasak, formulak, hitz-jokoak biltzen dira ERAren baliabide honetan.

Aurten argitaratutakoetan, hain zuzen ere, egoera jakin batzuetarako proposamenak bildu dira: haurrak mina hartzen duenerako, aspertuta dagoenerako, lokartu behar denerako, haien artean haserretzen direnerako…

Bideo guztiak ERAren Youtube kanalean ere ikus daitezke, transkribaketa eta, behar izanez gero, itzulpena barne.