Bizipozaren Jaia egin dute asteburuan, Bergaran. Zapatuan, Mundu berri bat guztiontzat ekitaldia egin zuten, eta domekan, aldiz, Pirritx, Porrotx eta Marimototsen bisita jaso zuten bertaratutakoek.

Irabazi asmorik gabeko gizartegintza egitasmoa da Bizipoza. Izaera bereziko gaiak landu, eta haurren eta familien ongizatea helburu duten 35 elkartek osatzen dute. Aniztasuna bistaratzea dute xede.

Aurkezpena eta testigantzak

Zapatuan eman zioten hasiera ekintzaz betetako asteburuari. Mundu berri bat guztiontzat ekitaldia egin zuten, eta izen bera daukan proiektua aurkeztu zuten. Bizipoza elkartea osatzen duten elkarteetako batzuk egunerokoan lantzen dituzten gaiak eta haien errealitatea erakutsi zituzten kantuen eta bideoklipen zein elkarteetako ordezkarien bitartez. Oporrak bakean elkarteak, Aspanogik, Aspanifek eta Gehituk hartu zuten parte ekitaldian. Bestetik, Ndank Ndank elkartea antolakuntzan aritu zen, Bergarako Udalaren, Bergarako Jardun euskara elkartearen eta Bizipoza elkartearekin batera.

Horren aurretik, janari senegaldarrean oinarritutako bazkari birtuala ere egin zuten. Osasun krisia medio, nor bere etxean aritu zen sukaldean, eta horren inguruko bideo eta argazkiak elkarbanatzeko aukera izan zuten.

Bazkari birtuala ere egin zuten, eta janari senegaldarra izan zuen oinarri. Osasun krisia medio, nor bere etxean aritu zen sukaldean, eta horren inguruko bideoak eta argazkiak elkarbanatzeko aukera izan zuten.

Pailazoak domekan

Igandean, bestetik, Pirritx, Porrotx eta Marimotots pailazoen ikuskizunaz gozatzeko aukera izan zuten elkarteetako ordezkariek zein bertaratutakoek. Elkarte bakoitzeko ordezkariak banan-banan igo ziren agertoki gainera ikus-entzuleei euren jardunaren berri eman, eta, horren ostean, pailazoekin batera kantuan eta dantzan egitera. Haurrak eta gurasoak dantzan jarri zituzten pailazoek, eta umore eta elkartasun keinuak ez ziren falta izan. 

Bizipozaren Jaiarekin elkarteek egiten duten lana bistaratu eta horri aitortza egitea lortu dute.