Eskola jazarpena haur eta gazte askoren egunerokoan presente dagoen errealitatea da, eta ondorio emozional eta sozial larriak eragin ditzake. Azken urteotan bullyingaren aurkako protokoloak indartu eta gizartearen kontzientziazioa handitu bada ere, adituek argi dute: prebentzioa da tresnarik eraginkorrena.

Helburu horrekin sortu du Ihitten Elkarteak Bullyingari galga! egitasmoa, Fagor Herrigintza lankidetza programaren babesarekin. Proiektuak euskarazko ikus-entzunezko baliabideak eskaintzen ditu, gure inguruko erreferentzia eta erreferenteekin, haur eta gazteen artean enpatia sustatzeko eta jazarpenaren inguruko hausnarketa bultzatzeko.

Edukietan bullyinga lehen pertsonan bizi izan duten gazteen testigantzak eta arloko adituen azalpenak biltzen dira. Helburua ez da soilik arazoaren berri ematea, baizik eta jazarpena identifikatzeko, prebenitzeko eta hari aurre egiteko tresna praktikoak eskaintzea.

Bullyingari galga! eskola komunitate osoari zuzendutako baliabidea da: ikastetxeei, aisialdi eta kirol taldeei, guraso elkarteei eta haur eta gazteekin lanean diharduten eragile guztiei. Egitasmoaren bidez, hezitzaileek eta familiek bullyinga saihesteko eta haurrei ingurune seguruagoa eskaintzeko baliabide erabilgarriak izango dituzte eskura.