Ez da berdina haurrak bero kolpe bat jasatea edo haurra deshidratatzea. Azken hau arrazoi desberdinengatik izan daiteke, bero kolpea aldiz, haurra eguzkitan eta prebentzio neurriak egoki jarraitu gabe gerta daiteke. Beraz, lehendabizi, bi hauen arteko berezitasuna zein den jakingo dugu, Leire Azpiazu erizainaren eskutik.

Bero kolpea

Bero kolpea gorputzaren tenperatura 40ºC heltzen denean eta tenperatura erregulatzen duen sisteman “akats” bat egotean gertatzen dela azaldu du Azpiazuk. “Nekea, botagurea, buruko mina, zorabioa eta irritabilitatea agertzen dira”, gaineratu du.

Haurra itzaletan eta toki freskoago baten jartzea gomendatzen du eta gorputz tenperatura jaistea izango da horren helburua. Horretarako, buruan, lepoan eta bularrean urarekin bustitako zapiak jartzeko gomendioa egiten du eta ura eskainiko diogu kontziente baldin badago. Kasu horietan, osasun zentro batera eramango dugu ahalik eta azkarren.

Prebentzioa izango da bero kolpea ez gertatzeko lehen pausua, horixe dio Azpiazuk: “Hidratazio egokia mantentzea, ordu beroenak saihestea, arropa egokia eta haurrak auto barruan ez uztea izango dira kontuan hartu beharreko puntu garrantzitsuenak”, gaineratu du.

Deshidratazioa

Deshidratazioa aldiz, lehen azaldutako moduan, faktore desberdinek eragin dezakete. Esaterako, haurra gaixo dagoenean, sukarrak, beherakoak zein gorakoek haurra deshidratatzera eraman dezakete.

Kasu honetan, gernu kantitatea gutxituko da deshidratazio mailaren arabera, eta gorputz-adarretako berotasuna nabariko dugu. Horrez gain, mukosak sikuak izango dituela ere badio. Deshidratazio maila handitzen doan heinean, gero eta zantzu gehiago ikusiko dira, hala nola, “bihotz maiztasunaren handitzea eta haurra irritableago” egongo da.

Lehen neurria haurra hidratatzea izango dela azpimarratu du erizainak. Ahal den neurrian, ahotik likidoak zein ama-esnea eskainiko diogu. Tolerantzia ona lortzen bada, likidoak eskainiz nahikoa izango da eta bere kabuz arazoa konponduko da. Tolerantzia ezinezkoa bada edota sukarra mantentzen bada, osasun zentrora eramango dugu haurra bertan balorazioa egin eta jarraitu beharreko irizpideak jasotzeko. Horiek izan dira Azpiazuren gomendioak.