LHL du izena ekimenak, eta izena dator Linza-Hiru Erregeen Mahaia-Leitza ibilbidea izeneko erronkatik. Koronabirusaren ondorioz leitzarrek ez dute 2021ean Leitzako Mendi Erronka egiterik izan, baina bi lagunek – Iraitzek eta Ikerrek– 150 kilometro inguruko eta 6.000 metroko desnibela duen ordezko proba egitea erabaki zuen. 24 ordu baino gehiago korrika!

Behin esfortzua egiten hasita, ordea, erronka solidario bihurtzeko ideia hasi ziren mamitzen eta berehala etorri zitzaien burura leitzar familia bat. Udane izeneko alaba dute, eta munduan bost kasu soil baino ez dituen gaixotasuna du, horrek dakartzan zailtasun eta oztopo guztiekin. Gurpildun aulkian mugitzen da, eta agerikoa da gure herriak, orokorrean, ez daudela egokituta bestelako mugikortasun eta errealitateak dituzten pertsonentzat.

“Hasiera batean ideia zen diru-bilketa egitea, tratamenduren bat edo gailuren bat eskuratzeko. Baina familiarekin hitz egin ondoren eta haiek hala eskatuta, gure asmoak beste norabide eta dimentsio bat hartu zituen: behar bereziak dituzten pertsonei bizitza errazteko ekarpenak egitea eta herritarrengan sentsibilizazioa areagotzeko kanpaina abian jartzea ekimen desberdinen bitartez. Finean, Leitza herri inklusiboagoa bilakatzea”, azaltzen dute webgunean bultatzaileek. 

Sei familia eta makina bat herritar auzolanean

“Denontzako herria eraiki nahi dugu (…) Gure ekimenaren bidez, hauxe lortu nahi dugu: behar bereziak dituzten pertsonei bizitza errazteko ekarpenak egitea eta herritarrengan sentsibilizazioa areagotzeko kanpaina abian jartzea ekimen desberdinen bitartez. Finean, Leitza herri inklusiboagoa bilakatzea”

Lan handia egin dute eta sentsibilizazio kanpainen bidez eta bestelako ekimenen bidez lortu dute herri lan sare bat eratzea. Denen esfortzuarekin, berriz, Leitzak egokitutako aparkalekuak ditu, bidexka bat plazan, piktogramak han eta hemen eta nahiko lukete bildutako diruarekin beste hainbat egitasmo burutu, tartean egokitutako jolas parke bat.

Diru ekarpenak jasotzeko martxan duten ekimenak Erosi zure metroa du izena, eta Metro bat euro bat du aldarri. Webgunearen bitartez egin daitezke ekarpenak, besteak beste.

Ekimen esportagarria

Ekimen interesgarria da. Familia giroan eta herriko neska-mutikoen inplikazioaren egin dute bidea eta ekimen esportagarria dela aldarrikatzen dute nork edo nork erreleboa hartzeko ilusioarekin.

Ekimenaren inguruan ETBko Biba zuek saioan egindako tartea hemen.